Muri tombola ya 1/8 cy’irangiza yaberega ku Cyicaro gikuru cy’Ishyirahamwe Nyarwanda ry’Umupira w’Amaguru, Ferwafa, ikipe ya Kiyovu Sports yisanze igomba gucakirana na La Jeunesse FC bikomoka hamwe i Nyamirambo.
Nyuma yo kubanza gukina ijonjora ry’ibanze ku makipe amwe, kuri uyu wa Gatanu habaye tombola y’uko amakipe 16 azahura muri 1/8.
Iyi tombola yabereye ku Cyicaro gikuru cya Ferwafa, yasize Urucaca rwo ku Mumena ruzacakirana na La Jeunesse FC bahuje ikibuga cyo ku Mumena n’ubwo imwe isigaye ikorera ku Ruyenzi.
Undi mukino ukomeye muri 1/8, ni uzahuza ikipe zisanzwe ari abakeba, Marine FC na Étincelles FC zisanzwe zisangiye Stade Umuganda y’i Rubavu.
Umukino wundi wo kureba muri iyi mikino, ni uzahuza Sunrise FC na Police FC yayitsindiye i Nyagatare mu mukino ubanza wa shampiyona. Iyi kipe y’Igipolisi cy’u Rwanda, yitwaye nabi i Nyagatare binatuma itangira nabi shampiyona.
Umuyobozi wa Komisiyo y’amarushanwa muri Ferwafa akaba n’Umujyanama mu by’amategeko, Jules Karangwa, yavuze ko uko amakipe azahura bizatangazwa mu gihe kidatinze.
Imikino ibanza biteganyijwe ko izakinwa tariki 28 Gashyantare 2023, iyo kwishyura izabe tariki 1 Werurwe uyu mwaka.
Uko tombola yose yagenze:
- Kiyovu Sports vs La Jeunesse FC
- APR FC vs Ivoire Olympique FC
- Bugesera FC vs Musanze FC
- Intare FC vs Rayon Sports
- Ésperance vs Rwamagana
- Sunrise FC vs Police FC
- Rutsiro FC vs Mukura VS
- Marine FC vs Étincelles FC
Ikipe niramuka yeukanye ibikombe byombi [shampiyona n’icy’Amahoro], izasohokana n’iyageze ku mukino wa nyuma w’Igikombe cy’Amahoro.
- Advertisement -
UMUSEKE.RW
