Byabaye bibi cyane, amasasu yavuze mu myigaragambyo ibera muri Kenya

Umuntu umwe yarashwe arapfa mu myigaragambyo ikomeye iri kubera muri Kenya, abatavuga rumwe na Leta basabye ababakurikira kwigaragambya ngo Leta igire icyo ikora ku kiguzi cy’ubuzima kiri hejuru.

Amakuru ya BBC avuga ko uwarashwe ari uwo mu mujyi wa Kisumu, mu Burengerazuba bwa Kenya.

Abigaragambya baramagana ikiguzi cy’ubuzi kiri hejuru.

Mu mujyi wa Nairobi ho Polisi yakomeje gushyamirana n’abatuye mu duce tw’utujagari tutemewe.

Abasirikare bitabajwe kugira ngo bahoshe imyigaragambyo yatumijwe na Raila Odinga, utavuga rumwe n’ubutegetsi ariko bisa n’ibyabaye kongera petrol mu kibatsi cy’umuriro.

Minisiteri y’Umutekano na Polisi bivuga ko imyigaragambyo irimo kuba itemewe n’amategeko.

Kuri uyu wa Mbere ndi amagana y’urubyiruko rwigaragambya yigabije isambu ya Uhuru Kenyatta wabaye Perezida wa Kenya, ikaba iherereye mu nkengero z’umujyi wa Nairobi.

Abigaragambya batemye ibiti, biba amatungo arimo intama ndetse n’ibiribwa, banatwika iyo sambu. Ntabwo hamenyekanye impamvu yabibateye.

Raila Odinga wahamagaje imyigaragambyo ni uwo mu ihuriro Azimio La Umoja One Kenya, avuga ko ubushize yibwe amajwi mu matora.

Anashinja Perezida William Ruto kunanirwa gukemura ikibazo cy’ubuzima buhenze mu gihugu.

Odinga, yabaye Minisitiri w’Intebe wa Kenya, yatsinzwe amatora yabaye muri Kanama, 2022 akaba yari ashyigikiwe na Uhuru Kenyatta.

Iyi myigaragambyo ikomeye iraba mu gihe Perezida William Ruto ari mu ruzinduko rw’akazi mu Bubiligi no mu Budage.

Ubwoba ni bwose ku batuye umujyi wa Nairobi

UMUSEKE.RW