Abagizweho ingaruka n’intambara y’iKisangani, mu ntara ya Tshopo, muri Repubulika Iharanira Demokarasi ya Congo, Kuri uyu wa Gatanu tariki ya 21 Mata 2023, basabye guverinoma kubishyura indishyi yasigaye.
Ubwo busabe bwatanzwe na Etefa Katusi,uhagarariye ishyirahamwe ry’Abagizweho ingaruka n’ubwicanyi bw’iKisangani.
Etefa yavuze ko bategereje amezi menshi indishyi y’icyiciro cya kabiri ariko ko ngo bamwe bapfuye batabonye ayo mafaranga.
Kuri we avuga ko mu myaka 23 ishize ubwicanyi bubaye, abagera kuri 500 bishwe n,’indwara kubera kubura amikoro yo kwivuza.
Ati” Twategereje indishyi zacu ariko amaso yaheze mu kirere.Turicuza cyane kuko bamwe muri twe bishwe n’indwara kubera kubura ubushobozi bwo kwivuza.Hari abapfuye benshi kubera kubura ubufasha.”
Guverinoma ya Congo muri Nzeri 2020 yatanze Miliyoni 1,5$ nk’icyiciro cya mbere cy’indishyi kuri abo bantu.
Katusi Etefa yasabye Leta kwishyura igice cya Kabiri cy’indishyi yabemereye yatanzwe na Uganda mu rwego rwo guha ubutabera abagizweho ingaruka n’iyo ntamba bo mu Burasirazuba bwa Congo.
Etefa yagize ati “Turi gusaba iyo ndishyi. Ubu twabonye iya mbere ariko iya kabiri ntabwo ubu iratugeraho. Ntabwo tuzi impamvu.”
Akomeza ati”Hari amafaranga Miliyoni 65$ ya Uganda yahaye Kishasa mu mezi umunani. Kubera iki tutayabona? Abayobozi baba barayatwaye? “
- Advertisement -
Kuwa 9 Nzeri 2022 Leta ya Congo yakiriye Miliyoni nyinshi z’amadolari zitanzwe na Uganda, nyuma yo gushinjwa kugira uruhare mu bwicanyi muri Congo.
Bivugwa ko Miliyoni 65 $ zatanzwe nk’icyiciro cya mbere z’indishyi ku miryango yagizweho ingaruka n’ubwicanyi.
Urukiko mpuzamahanga rwa ONU, ruzwi nka International Court of Justice (ICJ), rwanzuye ko Uganda yarenze ku masezerano mpuzamahanga ubwo yafataga ubutaka bw’icyo gihugu hagati y’umwaka wa 1998 na 2003.
Abacamanza basanze Uganda ari yo yateje impfu z’abantu bari hagati ya 10,000 na 15,000 mu ntara ya Ituri mu burasirazuba bwa DR Congo.
Yasabwe kwishyura miliyoni 325 z’amadolari y’Amerika .
Miliyoni 225 z’amadolari y’Amerika z’indishyi ku bantu .Hari Kandi miliyoni 40 z’amadolari y’Amerika z’indishyi ku mitungo yangijwe, na miliyoni 60 z’amadolari y’Amerika z’indishyi ku mitungo yasahuwe.
DR Congo yareze Uganda mu mwaka wa 1999 kubera ibikorwa by’ubushotoranyi bukoreshejwe intwaro yakorewe hamwe n’abaturage bayo. Yashinje abasirikare ba Uganda ubusahuzi no guhonyora uburenganzira bwa muntu.
TUYISHIMIRE RAYMOND/UMUSEKE.RW
