Kuri uyu wa Kane ni bwo ikipe y’Igihugu y’u Rwanda y’umupira w’amaguru, Amavubi, yageze mu Karere ka Gisagara aho igiye gukoremereza umwiherero, yakiranwa ubwuzu n’inkumi zamwenyuriraga abakinnyi.
Amavubi yahagurutse i Kigali mu masaha ya mu gitondo, yageze kuri Montana Hotel aho agomba gucumbika ahagana saa Munani n’Igice. Icyemezo cyo kujya muri iyi Hotel cyafashwe kuko mu Karere ka Huye ho hazaba hacumbitse Mozambique izakina n’u Rwanda tariki 18 Kamena 2023
Hoteli Mater Boni Consilii na Credo Hotel zo zizakira Mozambique ndetse n’abasifuzi bazayobora uyu mukino, cyane ko ziherutse guhabwa inyenyeri enye.
Mbere yo kwerekeza mu Karere ka Gisagara, Amavubi yari amaze iminsi irindwi atangiye umwiherero kuko yawinjiyemo tariki 8 Kamena 2023 muri Hotel Villa Portofino i Nyarutarama ariko imyitozo yakorerwaga kuri Kigali Pelé Stadium.
Mu bakinnyi 28 bahamagawe, babiri ni bo batari kumwe n’abandi. Abo ni Rafael York ukinira Gefle IF yo muri Suède bivugwa ko yagize imvune na Imanishimwe Emmanuel ukinira FAR Rabat wabanje kwifashishwa mu mukino wa Shampiyona ikipe ye yakinnye.
Umukino w’u Rwanda na Mozambique ni uwa gatanu mu itsinda L mu yo gushaka itike y’Igikombe cya Afurika kizabera muri Côte d’Ivoire mu ntangiriro za 2024.
U Rwanda ruzakira Mozambique ku Cyumweru, tariki ya 18 Kamena 2023, kuri Stade Mpuzamahanga ya Huye.
Nyuma y’imikino ine imaze gukinwa, u Rwanda ni urwa nyuma mu Itsinda L n’amanota abiri, Mozambique ikanganya amanota ane na Bénin mu gihe Sénégal ya mbere n’amanota 12, yamaze kubona itike.
UMUSEKE.RW
