Abateguye Agaciro Pre-Season bahaye imiryango 100 Mutuelle de Santé

HABIMANA Sadi 12/07/2023 10:09

Ubwo hasozwaga irushanwa rizwi nk’Agaciro Pre-Season Tournament, abariteguye batanze Ubwisungane mu Kwivuza, Mutuelle de Santé, ku miryango 100 itishoboye.

**Munyeshyaka Makini [uri ibumoso] wateguye Agaciro Pre-Season Tournament, yanatekereje ku Banyarwanda batishoboye**

Iri rushanwa ritegurwa na Munyeshyaka Makini ufashwa na Jimmy, ryasojwe ku wa Gatandatu tariki 8 Nyakanga 2023, ryegukanwa na Gatoto FC yatsinze Reveration FC ibitego 3-1.

Ubwo hatangagwa ibihembo ku makipe yitwaye neza ndetse n’abakinnyi, hanatangajwe ko abateguye iri rushanwa batekereje no ku Banyarwanda badafite ubushobozi bwo kubona Mutuelle de Santé.

Imiryango 100 idafite ubushobozi buhagije, yahawe ubu bufasha. Ikindi gikorwa cyiza cyakozwe, ni ukuzigamira iyi miryango yose muri Ejo Heza.

Munyeshyaka Makini aganira na UMUSEKE, yavuze ko bakoze iki gikorwa kuko byari ngombwa kugira icyo bagenera imiryango itishoboye ariko balanafatanya na Leta muri gahunda zitandukanye z’Iterambere.

Ati “Buriya Leta ni abaturage. Natwe turi abaturage. Byari ngombwa ko twahuza ngo abantu berebe icyo bagenera abatishoboye. Kandi buriya Leta ni umubyeyi, ni yo mpamvu tuba tugomba gufatanya muri byose.”

Ikipe yabaye iya Mbere, yambitswe imidari, ihabwa igikombe na miliyoni 1 Frw. Iya Kabiri yahembwe ibihumbi 500 Frw, iya Gatatu ihembwa ibihumbi 300 Frw.

Kimenyi Yves wa Gatoto FC yabaye umunyezamu mwiza w’irushanwa, Siméon na we w’iyi kipe, yabaye umukinnyi w’irushanwa, Niyibizi Ramadhan wa Brésil & Friends ahembwa nk’uwatsinze ibitego byinshi muri iri rushanwa.