Umutoza mukuru w’ikipe ya Rayon Sports, Yamen Zelfani, yangiye Jonathan Ifunga Ifasso, gukora imyitozo kubera kuyikererwamo.
Ibi byabaye ku myitozo yo ku wa Gatatu tariki 19 Nyakanga 2023, yebereye mu Nzove aho iyi kipe isanzwe yitoreza.
Ubusanzwe Rayon Sports itangira Saa cyenda z’amanywa, ariko uyu munye-Congo w’imyaka 24 yaje harenzeho iminota 20 maze ahita abuzwa kwitozanya n’abandi.
Ifunga ubwo yageraga ku kibuga, yabanje kujya aho abatoza bari bahagaze hagati mu kibuga, maze amaze kubasuhuza ngo ahite asanga bagenzi be, umutoza mukuru amubwira ko atitozanya n’abandi kuko yakererewe.
Amakuru UMUSEKE wamenye, avuga ko uyu mukinnyi uba mu nyubako za Perezida w’iyi kipe ikunzwe na benshi mu Rwanda, Rtd Cpt Uwayezu Jean Fidèle, yatanze impamvu zo kuba imodoka yamusize ariko ntizumvwa.
Uyu mukinnyi ukina hagati ariko asatira, yaje muri Rayon Sports avuye muri AS Simba yo muri Répubulika Iharanira Demokarasi ya Congo.
UMUSEKE.RW
