Urwego rw’Igihugu rw’Ubugenzacyaha, RIB rwabwiye UMUSEKE ko rwafunze abayobozi bashinzwe imyubakire mu Karere ka Nyarugenge, arakekwaho kunyereza umutungo wa Leta.
Aba bayobozi uwitwa Nkurunziza Alexis na Twagirayezu Baltazar batawe muri yombi tariki 15/09/2023.
Nkurunziza ni umukozi w’Akarere ka Nyarugenge ushinzwe imyubakire, naho Twagirayezu ashinzwe gukurikirana imyubakire y’amashuri mu Karere.
Bakurikiranyweho ibyaha bibiri (2), icyo kunyereza umutungo, n’icyaha cyo gukoresha nabi umutungo ufitiye rubanda akamaro.
Urwego rw’Igihugu rw’Ubugenzacyaha, ruvuga ko ibyaha bakekwaho babikoze mu bihe bitandukanye.
Imitungo yanyerejwe igizwe n’imifuka ya sima 418 ifite agaciro k’amafaranga miliyoni enye n’ibihumbi magana atatu (Frw 4,389,000).
Iyi mifuka ya sima yari igenewe kubakishwa amashuri mu Karere ka Nyarugenge.
Abafashwe bafungiye kuri RIB sitasiyo ya Nyamirambo mu gihe dosiye yabo iri gutunganwa ngo yohererezwe mu Bushinjacyaha.
RIB ivuga ko itazihanganira uwo ari we wese ukora ibyaha, birimo ibyo gukoresha umutungo wa Leta mu buryo bunyuranyije n’amategeko, akawukoresha mu nyungu ze bwite.
- Advertisement -
UMUSEKE.RW