Ibicishije ku mbuga nkoranyambaga, ikipe y’umupira w’amaguru iterwa inkunga n’Akarere ka Musanze, Musanze FC, yateguje ikipe y’Ingabo ko ititeguye kurekura umwanya wa Mbere.
Ku wa Gatanu tariki ya 6 Ukwakira 2023 kuri Kigali Pelé Stadium, hateganyijwe umukino uzahuza APR FC na Musanze FC Saa kumi n’ebyiri z’umugoroba.
Ni umukino w’ikirarane cy’umunsi wa Gatatu wa shampiyona, ikipe y’Ingabo itakiniye igihe kuko yari mu marushanwa Nyafurika y’Amakipe yabaye aya Mbere iwa yo, CAF Champions League.
Mbere gato y’uko umukino uba, ikipe ya Musanze FC urutonde rwa shampiyona, yifashishije ibikoko bibiri, Ingagi n’Intare igenera ubutumwa bugaragaza ko ititeguye kuzatakaza amanota i Kigali.
Muri ubu butumwa, ifoto igaragaza Ingagi iri hejuru y’Intare. Bishatse kuvuga ko ikipe y’i Musanze izagora iy’Ingabo yiyita Intare.
Musanze FC iyoboye urutonde rwa shampiyona n’amanota 10 mu mikino ine imaze gukina.
HABIMANA SADI/UMUSEKE.RW
