Abashinzwe ibikoresho mu makipe y’umupira w’amaguru mu Rwanda, bari mu nzira zo gushaka ibikorwa bibahuriza hamwe hagamijwe kwiteza imbere biciye mu kazi bakora.
Nk’uko bavuga ngo abishyize hamwe nta kibananira, ni ho Tuyisenge Eric ’Cantona’ na bagenzi be bakuye igitekerezo cyo guhuza imbaraga biciye mu bakozi bacunga Ibikoresho by’Amakipe bazwi nka b “Kit-Managers” mu ndimi z’amahanga.
Mu Rwanda si benshi baha agaciro akazi ko gushingwa ibikoresho by’amakipe akina umupira w’amaguru nyamara gatunze imiryango myinshi.
Nyamara n’ubwo badahabwa agaciro bakwiye, bakora akazi gakomeye kandi gashobora gutunga abagakora, cyane ko mu bagakora harimo abatunze imiryango kandi babikesha aka kazi.
Kimwe mu byerekana ko aba badahabwa agaciro, ni uburyo bafatwa mu makipe baba bakoramo kuko usanga hari n’abatagira amasezerano y’akazi.
Ni muri urwo rwego, abakamazemo igihe barimo Tuyisenge Eric uzwi nka Cantona, Hakizimfura Ayubu ubarizwa muri AS Kigali, Munyaneza Jacques uzwi nka Rujugiro, Uwase Ange, bahisemo gutangiza urubuga rwa WhatsApp rutuma bahaniramo ibitekerezo bibubaka mu kazi bahuriyemo.
Amakuru yizewe UMUSEKE wamenye, ni uko uru rubuga rumaze kugeramo abakora akazi ko gucunga ibikoresho mu makipe, 15 ariko ikigamijwe ari ukwaguka ku buryo ukora aka kazi wese mu Rwanda arwisangamo.
Mu bibahuza, harimo ibikorwa by’ubugiraneza byo gufashanya hagati ya bo ndetse bagakora n’ibindi bikorwa byo gusura abarwayi, kwishyurira abatishoboye Ubwisungane mu Kwivuza n’ibindi.
Bamwe mu bamaze kumenyekana bamaze kwihuriza hamwe ni Tuyisenge Eric ’Cantona’ ushinzwe Ibikoresho mu Ikipe z’Igihugu z’Ingimbi; na Munyaneza Jacques uzwi nka Rujugiro bashinzwe ibikoresho by’Ikipe y’Igihugu “Amavubi”, Hakizimfura Ayubu ushinzwe Ibikoresho muri AS Kigali FC na Uwase Ange ushinzwe Ibikoresho mu Ikipe y’Igihugu y’Abagore Nkuru n’iz’Abangavu.
- Advertisement -
Gusa uretse aba, hari n’abandi bakora aka kazi barimo Habumugisha Ernest (APR FC), Itangishaka Pascal (Mukura VS), Rukundo Jean na Muhoza Sembagare Ally ba Musanze FC.
HABIMANA SADI/UMUSEKE.RW
