Biciye mu isiganwa ryiswe ‘Akagera Rhino Race’ rizagera kuri Pariki y’Akagera, abayituriye bazaryoherwa no kubona abakinnyi babigize umwuga ndetse n’abakoresha amagare asanzwe [matabaro] mu irushanwa.
Biciye mu bufatanye na Pariki y’Akagera, Ishyirahamwe ry’Umukino w’Amagare mu Rwanda, Ferwacy, ryateguye isiganwa ry’amagare ‘Akagera Rhino Race’, rizaba rigamije kwishimira inyamaswa y’Inkura ndetse n’uko Pariki y’Akagera ikomeje kubungwabungwa.
Iri siganwa rizaba ku wa Kabiri tariki ya 26 Ukuboza 2023, rizahagurukira kuri BK Arena, rizasorezwe i Rwinkwavu. Abaturiye Pariki batabigize umwuga, bazakoresha amagare asanzwe, bazasiganwe ku ntera y’ibilometero 35.
Abakinnyi babigize umwuga bazitabira iri siganwa, bazasiganwa ku ntera y’ibilometero 90.3. Hazasiganwa ibyiciro byose birimo abagabo n’abagore bakuru ndetse n’abatarengeje imyaka 23.
Mu Mujyi wa Kigali, azahagurukira BK Arena – Kimironko – Kigali Parents.
Bazakomeza i Kabuga – Rugende – Nyagasambu – Rwamagana – Kayonza – Kabarondo – Rwinkwavu – Stade ya Rwankwavu.
HABIMANA SADI/UMUSEKE.RW
