Abakinnyi bakiri bato baserukiye u Rwanda mu mikino mpuzamahanga ya Tennis mu Burundi batashye irushanwa ritarangiye, nyuma y’icyemezo cyafashwe n’ubutegetsi bw’u Burundi cyo gufunga imipaka ibuhuza n’u Rwanda.
Abatashye bari mu irushanwa ryitwa ‘East African Junior Championship 2024″ rigombaga gusozwa kuri iki cyumweru tariki 14 Mutarama 2024.
Ku gicamunsi cyo ku wa Gatanu ni bwo abakinnyi 16 b’Abanyarwanda bahagurutse i Bujumbura batabimenyesheje abateguye iryo rushanwa.
Zephanie Niyonkuru, Umunyamahanga Uhoraho muri Minisiteri ya Siporo, yemeje ko abo bana batashye kubera imyanzuro yafashwe na Guverinoma y’u Burundi.
Yagize ati “Ni byo, abakinnyi bageze mu Rwanda ku wa Gatandatu mu gitondo. Uzi ingamba Leta y’u Burundi yafashe zo gufunga imipaka n’u Rwanda, rero ntabwo warekerayo abana mu bihe nk’ibyo.”
Ku wa 11 Mutarama 2024 ni bwo Guverinoma y’u Burundi yafunze imipaka yose ihuza icyo gihugu n’u Rwanda nyuma y’iminsi mike icyo gihugu giciye amarenga yo kuyifunga.
NDEKEZI JOHNSON / UMUSEKE.RW