Ibice bitandukanye muri Teritwari ya Rutshuru hiriwe imirwano, inyeshyamba za M23 zivuga ko zatewe ziritabara.
Umuvugizi wa politiki wa M23, Laurence Kanyuka yatangaje ko ingabo za Congo, FARDC n’abazishyigikiye ku rugamba bahunze agace ka Katsiro n’inkengero zako, bahasiga n’imbunda nyinshi.
Amakuru avuga ko imirwano yabaye yaguyemo abantu umunani b’abasivile barimo abagore babiri n’abana batatu, ikaba yanakomerekeyemo abantu benshi.
Umwe mu banyamakuru bakorera mu Burasirazuba bwa Congo, yemeza ko imirwano yakomeje mu masaha y’ikigoroba, akemeza ko inyeshyamba za M23 zafashe agace kitwa Kihondo hafi y’ahitwa Nyanzale.
Muri kariya gace ngo habayeho ibikorwa by’ubusahuzi nk’uko umwe mu bahatuye yabibwiye uriya munyamakuru.
Imirwano yabaye kuva mu gitondo kuri uyu wa Mbere, buri ruhande rushinja urundi kurugabaho ibitero, M23 ivuga ko yatewe, abo ku rundi ruhande bakavuga ko M23 yateye ibirindiro bya FARDC ahitwa Nyanzale, n’ahitwa Mabenga.
Kubera iyo mirwano abaturage benshi bahunze.
ISESENGURA
- Advertisement -
UMUSEKE.RW