Imirwano hagati y’inyeshyamba za M23 n’ingabo za Leta ya Congo, FARDC n’abo bafatanya urugamba yongeye kubura nyuma y’iminsi micye hari agahenge.
Amakuru ava muri Repubulika Iharanira Demokatasi ya Congo avuga ko imirwano iri kubera mu bice bya SAKE no mu nkengero zayo, ndetse ko abaturiye ibi bice bari guhunga imirwano.
Jean Francois Rutwara uba ahitwa Mubambiro yabwiye BBC ati “Twari tumaze iminsi hari agahenge, ariko uyu munsi haramutse imirwano ikomeye cyane, kandi biragoye kumenya uwateye undi bwa mbere.”
Imisozi ikikije Sake iriho ibirindiro bimwe na bimwe bya M23, mu gihe muri centre ya Sake gusubira iburasirazuba werekeza Mubambiro na Goma hakigenzurwa n’ingabo za leta, ingabo za SADC n’abitwa Wazalendo.
Umuvugizi wa M23/AFC, Lawrence Kanyuka, yatangaje kuri X yahoze ari Twitter ko ingabo za leta n’abakorana na zo “kuva muri iki gitondo bateye abaturage b’abasivile i Sake n’inkengero zayo”.
Yavuze ko M23 (Armée Révolutionnaire Congolaise, ARC) yarinze abaturage ibyo bitero byagabwe ahitwa i Sake, Macafe, Mitumbara, Lushoga, Kagundu no mu nkengero zaho.
Inyeshyamba za M23 zanagaragaje intwaro zafatiye muri iyo mirwano cyakora nta rundi ruhande rwigenga rwabyemeje.
Hari hashize ibyumweru bibiri birenga nta mirwano yumvikana i Sake nyuma y’imirwano ikomeye yahabaye mu kwezi gushize.
- Advertisement -
Icyakora mu byumweru bishize, inyeshyamba za M23 zagiye zigarurira uduce dutandukanye, muri Masisi na Rutshuru.
ISESENGURA
Abaturage ibihumbi bari batuye mu isantere ya Sake n’inkengero zayo benshi bahunze berekeza mu nkambi ziri mu nkengero z’umujyi wa Goma.
Isantere ya Sake iri muri teritwari ya Masisi kuri 25km uvuye i Goma.
UMUSEKE.RW