Mu mukino wo Koga, ikipe ya Mako Sharks Swimming Club, yahize izindi zose mu irushanwa Ngarukamwaka rya “Mako Sharks Summer Invitational Swimming Championship 2024.”
Tariki ya 1-2 Kamena, muri Pisine ya Green Hills Academy iherereye i Nyarutarama, habereye irushanwa Ngarukamwaka rizwi nka “Mako Sharks Invitational Swimming Championship 2024.”
Iri rushanwa ritegurwa n’ikipe ya Mako Sharks Swimming Club, iri mu zikomeye mu Rwanda no mu Karere ka Afurika y’i Burasirazuba ifatanyije na Davis & Shirtliff.
Uretse amakipe y’imbere mu Gihugu, hari hatumiwe n’andi yo mu Bihugu by’ibitutanyi by’u Rwanda nka Uganda.
Mu Rwanda hitabiriye Mako Sharks Swimming Club, Cércle Sportif de Karongi, Kigali Sporting Club.
Ikipe ya Mako Sharks Swimming Club, yegukanye igikombe nyuma yo kubona amanota 3597, ikurikirwa na Aquatic Academy Kampala yo muri Uganda, yagize amanota 3590.5.
Ikipe ya Silverfin Academy yo muri Uganda, yegukanye umwanya wa Gatatu n’amanota 1658, Cércle Sportif de Karongi yabonye umwanya wa Kane n’amanota 1127.
Heartz Swimming Club yatahanye umwanya wa Gatanu n’amanota 929, Kigali Sporting Club yo yabonye umwanya wa Gatandatu n’amanota 492 mu gihe Whales Swimming Academy Entebbe yo muri Uganda, yatahanye umwanya wa Karindwi n’amanota 210.
Umuyobozi wa Mako Sharks Swimming Club, Bazatsinda James, yavuze ko bishimira ubwitabire muri uyu mwaka n’ubwo hari amakipe bari batumiye ariko ntabashe kuza.
- Advertisement -
Ati “Ku ruhande rwacu nka Mako Sharks twarabyishimiye cyane. Kubera ko kuri iyi nshuro ni bwo tubonye amakipe menshi avuye Uganda. Hari n’andi yari yiyandikishije ariko ntibyakunda ko aboneka. Biragaragaza ko umukino wacu urimo kuzamuka.”
Uyu muyobozi yakomeje avuga ko hari hatumiwe amakipe 12 harimo ayo mu Rwanda n’ayo hanze ya rwo ariko haboneka umunani. Mu zitarabashije kuboneka, harimo abiri yo muri Kenya, imwe yo muri Ghana n’imwe yo muri DR Congo.
James yakomeje ashimira ababyeyi b’abana bakina muri Mako Sharks Swimming Club, cyane ko ari bo batuma irushanwa nk’iri Mpuzamahanga.
Abakinnyi bagera ku 170 ni bo bari bitabiriye iri rushanwa. Habayemo ibikorwa (Events) birenga 1000.
Mako Sharks Invitational Swimming Championship kuva yaba Mpuzamahanga, yari ibaye ku nshuro ya Kabiri mu gihe muri rusange yabaga ku nshuro ya Kane. Umwaka ushize abakinnyi 98 ni bo bari bitabiriye.
UMUSEKE.RW
