Umukandida wa FPR-Inkotanyi, Perezida Paul Kagame na Madame Jeannette Kagame, bari mu Banyarwanda bitabiriye Amatora ku mwanya w’Umukuru w’Igihugu n’Intumwa za Rubanda.
Kuri uyu wa Mbere tariki ya 15 Nyakanga 2024, ni bwo mu Rwanda habaye amatora ku mwanya w’Umukuru w’Igihugu n’Intumwa za Rubanda.
Abanyarwanda batuye hanze y’Igihugu batoye ku Cyumweru tariki ya 14 Nyakanga mu gihe abatuye imbere mu Gihugu batoye uyu munsi.
Perezida Paul Kagame ari kumwe na Madame Jeannette Kagame, batoreye kuri Site y’Itora iri mu Kigo cy’ishuri ryisumbuye rya ‘Gacuriro Technical Secondary School’ kizwi nka SOS, riherereye mu Murenge wa Kinyinya mu Karere ka Gasabo, mu Mujyi wa Kigali.
Abandi bakandida bahatanira umwanya w’Umukuru w’Igihugu, Dr Frank Habineza w’ishyaka DGPR n’umukandida wigenga, Mpayimana Philippe na bo batoye mu ma saa yine.
Umukandida wa FPR-Inkotanyi yagaragarije mu bikorwa byo kwiyamamaza ko yizeye gutsinda aya matora. Yabishingiye ku bwitabire bw’abamushyigikiye kuri site zitandukanye bwari hejuru.
Umukandida wigenga, Mpayimana we yatoreye kuri site ya Camp Kigali mu Karere ka Nyarugenge, yabwiye itangazamakuru ko na we yizeye intsinzi, ateguza abamushyigikiye ko bamwenyura ubwo Komisiyo y’igihugu y’amatora iraba itangaza iby’ibanze byavuye mu matora.
Byari biteganyijwe ko aya matora ararangira saa cyenda z’amanywa. Biteganyijwe ko mu masaha y’umugoroba ari bwo Komisiyo y’amatora itangaza iby’ibanze byayavuyemo.
- Advertisement -
![](https://umuseke.rw/wp-content/uploads/2024/07/IMG_9099-1.jpeg)
![](https://umuseke.rw/wp-content/uploads/2024/07/IMG_9100-1.jpeg)
![](https://umuseke.rw/wp-content/uploads/2024/07/IMG_9101-1.jpeg)
UMUSEKE.RW