Minisiteri y’ubuzima muri Repubulika ya Demokarasi ya Congo ivuga ko abantu nibura 79 bishwe n’indwara itaramenyekana iteza ibimenyetso bimeze nk’iby’ibicurane, yadutse mu majyepfo ashyira uburengerazuba bw’icyo gihugu.
Mu itangazo yasohoye ku rubuga nkoranyambaga X, Minisiteri y’ubuzima ivuga ko iyo ndwara yamenyekanye guhera ku itariki ya 24 Ukwakira uyu mwaka, benshi mu bo imaze kwica bakaba ari abana bafite hejuru y’imyaka 15.
Abantu barenga 300 bamaze kwandura, bakaba bagaragaza ibimenyetso birimo nko guhinda umuriro, kurwara umutwe, kwimyira bya buri kanya no gukorora, kugira ibibazo byo guhumeka no kutagira amaraso ahagije mu mubiri.
Amatsinda y’abakora ubutabazi yoherejwe muri iyo ntara ya Kwango, by’umwihariko mu karere k’ubuzima ka Panzi, aho iyo ndwara irimo kugaragara cyane, kugira ngo bite ku barwayi ndetse bakore iperereza ku bwoko bw’iyo ndwara.
Umuyobozi wo mu muryango utari uwa leta (sosiyete sivile), Symphorien Manzanza, yabwiye ibiro ntaramakuru Reuters ko uko ibintu bimeze biteye impungenge kuko umubare w’abanduye ukomeje kwiyongera.
Yagize ati “Panzi ni akarere k’ubuzima ko mu cyaro, rero hari ikibazo cyo kuhageza imiti.”
Umukozi wo ku rwego rwo hejuru mu ishami ry’Umuryango w’Abibumbye ryita ku buzima (OMS) wo ku rwego rw’Afurika, yabwiye BBC ko bohereje “itsinda muri ako karere kitaruye gukusanya ibipimo byo gukoreraho amaperereza muri laboratwari [laboratoire].”
Abategetsi basabye abaturage gutuza no kuba maso.
Banasabye abaturage gukaraba intoki bakoresheje amazi n’isabune, kwirinda kujya ahateraniye abantu benshi, no kwirinda gukora ku mirambo y’abapfuye mu gihe nta muganga uhari, no kumenyesha abashinzwe ubuvuzi mu gace baherereyemo igihe hari umuntu abaturage bacyetseho iyo ndwara cyangwa hari upfuye mu buryo budasanzwe.
- Advertisement -
Repubulika ya Demokarasi ya Congo imaze igihe inahangana n’ikiza gikaze cya virusi y’ubushita bw’inkende (cyangwa ‘mpox’). Hagati ya Mutarama na Nyakanga uyu mwaka, abategetsi babaruye abantu hafi 14,500 banduye iyo virusi.
UMUSEKE.RW
