Umutoza Ben Moussa ukomoka muri Tunisia, ari mu biganiro n’ikipe ya Police FC iheruka gutandukana na Mashami Vincent.
Tariki 8 Mutarama 2025, nibwo ikipe ya Police FC yatandukanye n’uwari umutoza wayo Mashami Vincent kubera umusaruro muke. Amakuru Umuseke.RW wamenye ni uko ikipe ya Police FC yatangiye ibiganiro n’umutoza Ben Moussa ukomoka mu gihugu cya Tunisia akaba yaba umusimbura wa Mashami Vincent ndetse byagenda neza agatangirana n’imikino yo kwishyura.
Ben Moussa asanzwe azi shampiyona y’u Rwanda cyane kuko tariki 16 Ukwakira 2022 yagizwe umutoza mukuru wa APR FC asimbuye nyuma y’uko uwari Umutoza Mukuru Mohammed Adil Erradi wari wahawe ibihano n’ikipe nyuma yo gushinjwa imyitwarire mibi.
Ben Moussa yahesheje Ikipe y’Ingabo z’Igihugu Igikombe cya Shampiyona ya 2022-23 ntiyongererwa amasezerano ndetse agera no ku mukino wa nyuma w’Igikombe cy’Amahoro aho yatsinzwe na Rayon Sports igitego 1-0.
Umuntu yavuga ko yaba ari amahitamo meza kuri Police FC kuko ubuyobozi bwayo bwagaragaje impunduka mu gushaka igikombe cya shampiyona kandi uyu mutoza akaba azi kugirwa uko bimera.
Ben Moussa kandi nk’umutoza mpuzamahanga, umuntu yavuga ko Police FC imukeneye kuko ishaka umutoza w’igitsure ndetse wabasha gusubiza ibintu ku murongo akongera gushyira abakinnyi mu mwuka umwe no kubaremo ikizere nk’uko yabikoze muri APR FC akimara gufata ikipe.
Ikipe ya Police FC yashoje imikino ibanza ya shampiyona iri ku mwana wa 4 n’amanota 23 mu mikino 15, ndetse ikaba yari mu makipe yatangiye neza shampiyona.