Igikorwa cyo guhanahana imfungwa hagati y’Abanyepalestine na Israel kirakomeje, aho abasirikare bane ba Israel barekuwe n’umutwe wa Hamas, bagomba kuguranwa Abanyepalestina 200.
Igisirikare cya Israel (IDF) gitangaza ko abo basirikare bane bamaze kugera mu gihugu cyabo nyuma y’amezi 15 bamaze mu maboko ya Hamas.
IDF yanditse ku rubuga rwa X iti: ‘Aba basirikare bane batahutse, Daniela Gilboa, Liri Elbag, Naama Levy na Karina Ariev, ubu bambutse urubibi binjira muri Israel bari kumwe na IDF hamwe n’ingabo za Shin Bet.’
Nyuma y’iryo tangazo, umuvuzi wa Israel mu gisata cy’ururimi rw’Icyarabu, Avicha Adraee, yasohoye ubundi butumwa bushima ubutwari bw’abo basirikare.
Ati: ‘Ni intwari mu buryo bwose bushoboka. Bahagaze nk’intwari imbere y’umutwe w’iterabwoba, bemye kandi nta gihunga.’
- Advertisement -
Yavuze ko nubwo banyuze mu bihe bikomeye bakorerwa iyicarubozo ry’ubwoko bwose, bitwaye neza kandi ntibacika intege.
Hagati aho, igisirikare cya Israel kivuga ko Hamas itubahirije ibyo yiyemeje mu masezerano yo guhagarika intambara.
Umuvugizi wacyo, Daniel Hagari, avuga ko bari kubanza kurekura abasivili imbere y’uko barekura abasirikare.
Nubwo Israel ivuga ibi, igikorwa cya Hamas cyari kigamije gutanga ubutumwa bw’ukwerekana ko ihagaze neza kandi idateze kugendera mu kwaha kwa Israel.
Aba bagore bane bazanywe mu mamodoka, baherekejwe n’abagabo bitwaje imbunda bambaye ibitambaro mu maso, bagezwa ahantu hateguwe neza, aho umutegetsi wa Croix Rouge yatereye igikumwe ku rwandiko ari kumwe n’umurwanyi wa Hamas.
Aba banya-Israel barekuwe bari bambaye imigozi mw’ijosi, iboheyeho amakarita ndangamuntu.
Uburyo Hamas yari yateguye icyo gikorwa byagaragara ko yizeye y’uko amashusho yacyo azerekana ko ari umutwe witeguye kandi ufite imbaraga.
Hamas yahaye ubutumwa Abanyepalestina ko umunsi umwe izagenzura Gaza, mu gihe Minisitiri w’Intebe wa Israel, Benjamin Netanyahu, yari yiyemeje gusenya burundu uyu mutwe nyuma y’igitero cyo ku wa 7 Ukwakira 2023.
Muri ayo masezerano, byitezwe ko abanya-Israel 33 bashimuswe na Hamas bazarekurwa baguranywa n’impfungwa z’Abanyapalestina mu gice cya mbere cy’ibyumweru bitandatu.
Ku Cyumweru gishize, Abanya-Israel batatu ni bo barekuwe, baguranywa n’impfungwa 90 z’Abanyapalestina.
Mu gikorwa cyo ku wa Gatandatu, irekurwa ry’aba basirikare b’Abanya-Israel b’abagore ryitezwe kujyana n’irekurwa ry’impfungwa z’Abanyapalestina 200 bafunguwe mu magereza atandukanye ya Israel.
Aya masezerano avuga ko buri musirikare umwe wa Israel aguranywa n’impfungwa z’Abanyapalestina 50, mu gihe umusiviri we aguranywa n’impfungwa 30 z’Abanyapalestina.
NDEKEZI JOHNSON / UMUSEKE.RW