Mu mukino ufungura iya shampiyona y’abagore yo kwishyura, ikipe ya Rayon Sports WFC ibifashijwemo na Ukwinkunda Jeannette uzwi nka Jiji, yatsinze Kamonyi WFC ibitego 2-0, ikomeza kuyobora urutonde rwa shampiyona by’agategnyo.
Kuri uyu wa Gatandatu, ni bwo hatangiye imikino yo kwishyura muri shampiyona y’icyiciro cya mbere mu Bagore. Imikino ibiri yari ihanzwe amaso n’abakunzi ba Ruhago y’abagore mu Rwanda, ni uwahuje Rayon Sports WFC na Kamonyi WFC wabereye mu Nzove n’uwahuje AS Kigali WFC na Bugesera WFC wabereye kuri Kigali Pelé Stadium.
Gikundiro yabanje kugorwa n’uyu mukino, ibifashijwemo na Ukwinkunda Jeannette “Jiji” wagiye mu kibuga asimbuye, yatsinze Kamonyi WFC ibitego 2-0 byagiyemo ku munota wa 86 n’uwa 90+4. Abaterwa inkunga n’Umujyi bo, babifashijwemo na Uwase Zawadi watsinze bibiri, Mutuyemariya Florentine Kalaba watsinze kimwe na Coralie Odette Elsie Eyeang Nguema watsinze kimwe, banyagiye Bugesera WFC ibitego 4-0.
Nyuma y’iyi mikino y’umunsi wa 13 wa shampiyona, Rayon Sports WFC yakomeje kuyobora urutonde rwa shampiyona n’amanota 35, mu gihe AS Kigali WFC yahise ifata umwanya wa kane n’amanota 24, Bugesera WFC yo ijya ku wa gatanu n’amanota 21.
Indi mikino yabaye kuri uyu wa Gatandatu:
Muhazi United WFC 3-1 Fatima WFC
Forever WFC 3-1 ES Mutunda WFC
Inyemera WFC 1-0 APR WFC
UMUSEKE.RW
