Ubushinjacyaha bwajuririye icyemezo cyafashwe n’urukiko rw’ibanze rwa Busasamana mu karere ka Nyanza cyo kurekura by’agateganyo Niyitegeka Eliezel wavugwagaho gutunga imodoka zirenga 25, ibibanza 120, igorofa i Kigali n’ibindi.
Ubushinjacyaha bwajuririye icyemezo cy’urukiko rw’ibanze rwa Busasamana mu karere ka Nyanza cyafashwe kuwa 14 Mutarama 2025.
Urukiko rw’ibanze rwa Busasamana rwafashe icyemezo cyo kurekura by’agateganyo Niyitegeka Eliezer waregwaga ibyaha bitandukanye birimo kunyereza imisoro, icyaha cy’iyezandonke, kudasobanura inkomoko y’umutungo atunze n’ibindi.
Ubushinjacyaha bwavugaga ko uyu mugabo yasoreshaga ikibuga cya leta cyakorerwagaho ibizamini kuri site ya Nyanza iherereye kuri sitade ya Nyanza aho buri modoka yabaga igiye gukoresha ikizamini yakwaga amafaranga ibihumbi icumi.
Ayo mafaranga arenga miliyoni 300 bikekwa ko yanyereje yakuyemo imitungo itandukanye irimo amamodoka arenga 25, ibibanza 120, igorofa mu mujyi wa Kigali n’ibindi.
Ubushinjacyaha bwanemezaga ko yiyitirara ubuyobozi agasoresha ubutaka bwa leta.
Eliezer Niyitegeka yaburanye ahakana ibyo aregwa avuga ko ibyo atunze byose yabikoreye ndetse yatowe n’abantu bigishaga imodoka aho yari umuyobozi w’iseta (site Manager).
Urukiko rw’ibanze rwa Busasamana rukorera mu karere ka Nyanza rwafashe icyemezo ari na cyo cyajuririwe n’ubushinjacyaha ko ibyagezweho mu iperereza bihagije ku buryo urukiko rubishingiraho rukeka ko icyaha Niyitegeka Eliezer acyekwaho yaba yaragikoze .
Urukiko rwemeje ko nta mpamvu zihari zatuma Niyitegeka Eliezer afungwa mbere y’urubanza.
- Advertisement -
Urukiko kandi rwategetse ko imitungo yose ya Niyitegeka Eliezer yafatiriwe irekurwa uru rubanza rukimara gusomwa.
Icyemezo cy’urukiko gisoza kigira kiti”Urukiko rutegetse ko Niyitegeka Eliezer afungurwa by’agateganyo agakurikiranwa ari hanze akajya yitaba umushinjacyaha ushinzwe kwiga dosiye buri wa mbere w’icyumweru cya nyuma cy’ukwezi.”
Amakuru yizewe UMUSEKE wamenye ni uko ubushinjacyaha bwajuririye icyemezo cy’urukiko rw’ibanze rwa Busasamana cyarekuye Niyitegeka Eliezer by’agateganyo mu rukiko rwisumbuye rwa Huye.
Niyitegeka Eliezer arazwi muri Nyanza by’umwihariko mu kwigisha imodoka ku bantu bashakaga ibyangombwa bibemerera gutwara ibinyabiziga.
Ibyakozwe n’ubushinjacyaha byo kujurira kiriya cyemezo bikurikije amategeko.
Amakuru avuga ko Niyitegeka Eliezer atarahabwa italiki yo kuburaniraho ubujurire kuri kiriya cyemezo akazaburanira mu rukiko rwisumbuye rwa Huye.
Hafashwe icyemezo mu rubanza “rw’umukire” utunze imodoka 25, ibibanza 120, n’inzu 200 i Kigali
Theogene NSHIMIYIMANA
UMUSEKE.RW