Umwe mu basirikare bakuru mu ngabo za Congo, FARDC, Col Rugabisha yarasiwe mu mirwano n’umutwe wa M23 muri Kivu y’Amajyepfo.
Amakuru y’urupfu rwe aravuguruzanya ku wamwishe. Bamwe bavuga ko yarashwe n’inyeshyamba za M23, abandi bakemeza ko yarashwe n’ingabo yari ayoboye zimushinja ubugambanyi.
Uyu mugabo yapfuye muri iki cyumweru aguye ahitwa Mukwija hafi ya Nyabibwe muri Kalehe.
Amakuru avuga ko bamwe mu basirikare yari ayoboye batangiye kumushinja kuba umugambanyi nyuma yo kubasaba gusubira inyuma.
Ibyo ngo byatangiriye ahitwa Ngungu ubwo hafatwaga na M23/AFC nyuma izo nyeshyamba zigafata na Minova.
Ubwo rero inyeshyamba za ahitwa Mukwija mu misozi, Col Rugabisha ngo yasabye abasirikare yari ayoboye gusubira inyuma, ntibabyumvikana umwe mu bamurinda amurasa amuturutse inyuma.
Ayo makuru UMUSEKE wayahawe na bamwe mu bo mumuryango wa Col Rugabisha twavuganye bakimenya iby’urupfu rwe.
Kuri uyu wa Gatandatu igisirikare cya Congo, FARDC cyemeje urupfu rwa Col Rugabisha kivuga ko yiciwe mu mirwano hagati y’ingabo za Congo n’umutwe wa M23 nk’uko bygarutsweho n’urubuga Actualite.cd.
Maj.Gen Ekenge Bomusa Efomi Sylvain, Umuvugizi wa FARDC yavuze ko Col Rugabisha yapfanye intwaro ye mu ntoki, akaba yari ayoboye igitero cyo gusubiza inyuma umutwe wa M23 ahitwa Nyabibwe.
- Advertisement -
Col. Rugabisha yari Komanda wa Brigade ya 12 mu gisirikare cya Congo, akaba ari umwe mu bo Perezida Felix Tshisekedi aherutse guha inshingano zo kurwanya M23, we na Gen Pacifique Masunzu.
UMUSEKE.RW