Umufaransa Fabien Doubey yegukanye Tour du Rwanda 2025

NDEKEZI Johnson 02/03/2025 4:26

Umufaransa Fabien Doubey ukinira ikipe ya Total Energies ni wegukanye Tour du Rwanda 2024 yakinwaga ku nshuro ya 17.

Muri iri siganwa habazwe ibihe by’uduce 6 kuko aka nyuma kahagaritswe katarangiye kubera imvura nyinshi yaguye mu Mujyi wa Kigali.

Irushanwa rya Tour du RWANDA 2025 ryatangiye ririmo abakinnyi 69 ryageze ku munsi wa nyuma risigayemo 64.

Abasiganwa bahagurukiye kuri Kigali Convention Centre bazenguruka mu bice bitandukanye by’Umujyi wa Kigali.

Imihanda yari gukoreshwa mu gace ka 7 yahinduwe nyuma y’uko imvura yaguye yatumye umuhanda wa Mont Kigali wandura ku buryo abakinnyi batari kuwunyuramo.

Hakoreshejwe imihanda ya KCC – Gishushu RDB – MTN – Kabuga ka Nyarutarama – UTEXRWA – Tennis Club – Golf Club – SOS – MINAGRI – Meridien – KBAC – RIB Kimihurura – Kimicanga – Kwa Mignonne – Kabindi – KABC – KCC, aho bazengurutse inshuro enye.

Nk’ibisanzwe, abapolisi baherekeje abasiganwa kugira ngo bakumire impanuka zo mu muhanda no kurinda ko abaturage bajya mu mihanda bigateza impanuka.

Kubera imvura nyinshi yatumye imihanda inyerera, isiganwa ryahagaritswe mu gihe abakinnyi biteguraga kwinjira mu gace ka nyuma.