Abanyamakuru bakorera ibitangazamakuru byo kuri murandasi n’urubyiruko rukunze gukoresha inbuga nkoranyambaga mu Karere ka Rusizi ndetse no muri Repubukika ya Demokarasi ya Congo, biyemeje kurwanya imvugo zihembera urwango.
Ku wa Kane tariki 1 Mata 2021 hifashishijwe ikoranabuhanga rya zoom nibwo ibiganiro ku ruhare rwabo mu kurwanya imvugo zihembera urwango n’amakimbirane byabaye.
Hageninana David Umuyobozi w’abafana ba Chelsea mu Karere ka Rusizi yagize ati “Ku mbuga duhuriraho cyane cyane whats app izo mvugo turazibona, ariko uwo bigaragayeho tumukura muri groupe abasigaye tukabihanangiriza tubabwira ko atari byiza gukwirakwiza imvugo nk’izo.”
Baduin we ni Umunyamakuru w’i Bukavu muri Kivu y’Amajyepfo, akorera ikinyamakuru cyandika kuri murandasi.
Yagize ati “Nk’abanyamakuru dukora kinyamwuga twiyemeje kujya tugenzura inkomoko y’amakuru dutangaza tukareba niba ntacyo yangiza kuri sosiete tukabirwanya hakiri kare.”
Umuryango utegamiye kuri Leta ukora ibikorwa bishingiye ku kubaka amahoro (La Benevolencia) uvuga ko basanzwe bahuza abantu batandukanye, ariko kubera ingamba zo kwirinda ikwirakwira rya COVİD-19 bifashisha uburyo bwa zoom.
Ngo basanze muri iki gihe ikibazo gikomeye kibangamiye amahoro mu Biyaga bigari ari imvugo zihembera urwango n’amakimbirane bicishwa ku mbuga nkoranyambaga.
Ngoma King umukozi w’uyu muryango ushinzwe ibikorwa byo kuwuhuza n’izindi nzego yagize ati “Amahoro ntabwo ari ikintu cyubakwa ngo gihite kirangira, bisaba urugendo, muri iki gihe mu Biyaga Bigari ikibazo gihari kibangamiye amahoro ni inyandiko zica ku mbuga nkoranyambaga zirimo ubutumwa bukangurira abandi gukora ubugizi bwa nabi.”
Yavuze ko ari yo mpamvu bahuje abantu bakoresha imbuga nkoranyambaga ngo babiganireho.
- Advertisement -
Avuga ko ubutumwa atanga ari uko buri wese yajya asesengura amakuru amugezeho mbere yo kuyaha abandi.
REBA YouTube Channel UMUSEKE TV video nziza nk’iyi. UKORA LIKE SHARE na COMMENT
Muhire Donatien/ Umuseke.rw/ i Rusizi
