Umukinnyi w’Ikipe y’Igihugu [Amavubi] na APR FC, Buteera Andrew yamaze gusubizwa ikipe yari yamutije muri AS Kigali FC ariko agakomeza kuzongwa n’imvune.
Mu ntangiriro z’uyu mwaka w’imikino (2021-2022), ikipe ya AS Kigali yatangaje ko yasinyishije Buteera Andrew ukina hagati mu kibuga.
N’ubwo iyi kipe yari yatangaje ko yasinyishije Buteera, ariko yari yamutijwe na APR FC uyu mukinnyi yari agifitiye amasezerano y’umwaka umwe.
Tariki 23 Nyakanga 2021, ni bwo uyu mukinnyi yatangajwe nk’umukinnyi mushya w’iyi kipe iterwa inkunga n’Umujyi mu gihe cy’umwaka.
Uyu mukinnyi utarahiriwe, yaje kugira ibibazo by’imvune bya hato na hato binatuma asubizwa mu ikipe yari yavuyemo.
Amakuru UMUSEKE wamenye, ni uko muri Mutarama uyu mwaka, ari bwo AS Kigali yandikiye APR FC iyimenyesha ko iyisubije umukinnyi yari yatijwe (Buteera) n’ubwo umwaka wari utararangira.
UMUSEKE wifuje kuvugana n’Umunyamabanga wa APR FC, hagamijwe kumenya amakuru y’uyu mukinnyi ndetse niba yaba akorana na bagenzi be, ariko telefone igendanwa ya, Masabo Michel, ntiyakunze.
Ibinyamakuru byo mu gihugu cya Uganda, biherutse gutangaza ko uyu mukinnyi yifuzwa n’amakipe abiri akomeye yo muri Afurika y‘Epfo n‘ubwo nyiri ubwite ntacyo arifuza kuvuga kuri aya makuru. Ayo makipe ibinyamakuru byavuze yifuza Buteera, ni Maritzburg United na Golden Arrows.
Uretse aya makipe yifuza uyu mukinnyi, hari n’izindi zo muri Iraq zimwifuza nk’uko ikinyamakuru bigwhalesports.com cyabitangaje. Erbil FC na Al Shorta ngo ntiziri kumuhozaho ijisho.
- Advertisement -
Mu myaka amaze mu ikipe y’Ingabo, uyu mukinnyi benshi bahamya ko ari mu beza u Rwanda rufite, yakunze kugorwa n’imvune ndetse ubwe yigeze kuvuga ko ajya arogwa kugira ngo atabona umwanya wo gukina.
