Kompanyi ya Dj Adams yashyize hanze igihangano cya mbere

NDEKEZI Johnson 16/04/2022 4:17

Mu rwego rwo gushyira itafari ku iterambere rya muzika nyarwanda, Supreme Music Group Africa yashinzwe na Aboubakar Mukara uzwi nka Dj Adams, yashyize hanze indirimbo ya mbere y’umuhanzi witwa Daniel Munana ukoresha izina rya Munana mu buhanzi.

*Kompany ya Dj Adams yatangiye gushyira hanze ibihangano by’abahanzi*

Iyi ndirimbo bise ‘Imitoso’ ikozwe mu njyana ibyinitse ya Amapiano ivanzemo n’injyana nyarwanda.

Dj Adams yabwiye UMUSEKE ko Supreme Music Group Africa ari kompanyi ije kunganira izisanzwe zikora umuziki ariko yo ikaba ifite umwihariko wo gukoresha injyana zivanzemo i Nyarwanda.

Ati “Dutekereza ko zizafasha abatuye muri Afurika kwiyumvamo ndetse n’Isi yose kumva Afurika by’umwihariko u Rwanda.”

Ku ikubitiro hasohowe indirimbo ‘Imitoso’ y’umuhanzi mushya witwa Munana, ikazakurikirwa n’izindi z’abahanzi batandukanye.

Dj Adams avuga ko uyu muhanzi batangiranye, yasanze ari umuhanzi w’umuhanga unafitiye urukundo umuziki.

Ati “Yatugiriye icyizere natwe turakimugirira, niyo ndirimbo ya mbere dukoze turizera ko bizatanga umusaruro ku mpande zombi.”

Dj Adams avuga ko abahanzi bose bafite urukundo rw’umuziki, ubushake n’ikinyabupfura bahawe ikaze muri iyi Kompani yitezweho kwagura umuziki w’abanyarwanda.

Iyi Kompani ya Dj Adams ifitanye imikoranire ya hafi na zimwe muri Kompanyi zikomeye ku mugabane wa Afurika aho ibihangano basohoye bikinwa mu bihugu nka Kenya, Tanzania, Uganda, Ghana, Nigeria, Angola, Zimbabwe, Zambia, Lesotho, Afurika y’Epfo n’ahandi.