Nyanza: Abaganga bakora mu Bitaro bya Nyanza baranenga bagenzi babo bakoze Jenoside yakorewe Abatutsi mu 1994 bakambura ubuzima abatutsi.
Ku nshuro ya 28 mu Rwanda n’inshuti zarwo bari mu minsi 100 yo kwibuka Jenoside yakorewe Abatutsi mu 1994, mu Bitaro by’Akarere ka Nyanza naho hari inzirakangane z’Abatutsi bahiciwe.
Angelique Uwera wiciwe ababyeyi bakoraga muri ibi bitaro, avuga ko kwibuka ababo ari ukubaha agaciro.
Ati “Kwibuka ni uguhesha agaciro abacu binatuma tuba mu murongo mwiza bifuzaga ko twabamo.”
Dr. Uwamahoro Gerard umuyobozi wungirije muri ibi bitaro anenga abaganga bagenzi be bijanditse mu bwicanyi mu gihe cya Jenoside.
Ati “Kuba abagombye gutanga ubuzima ari bo babunyaze ni abo kunengwa. Gusa, binerekana ko Jenoside yari ifite ubukana bwinshi kandi yari yateguwe igihe kirekire.”
Dr. Uwamahoro yakomeje ashimira ingabo za RPF-Inkotanyi zahagaritse jenoside yakorewe Abatutsi.
Umuyobozi w’Akarere ka Nyanza Ntazinda Erasme yasabye buri wese kwirinda ingengabitekerezo ya jenoside.
Ati “Birasaba kutarangara namba hirindwa ingengabitekerezo ya jenoside kugira ngo itazongera guhabwa intebe ikaba yatuma hongera kubaho jenoside.”
- Advertisement -
Abakozi 34 bakoze mu Bitaro bya Nyanza nibo bamaze kumenyakana ko bishwe mu gihe cya Jenoside yakorewe Abatutsi mu 1994.
Théogène NSHIMIYIMANA
UMUSEKE.RW/Nyanza
