Umwuka si mwiza mu rwambariro rw’ikipe ya Rayon Sports nyuma yo gushyamirana kwabaye hagati y’umunyezamu, Hategekimana Bonheur na bagenzi be bamushinja kuvuga nabi.
Tariki 3 Gicurasi 2023, ikipe ya Rayon Sports yatsinze Police FC ibitego 3-2 mu mukino wa ¼ w’igikombe cy’Amahoro, ihita inayisezerera.
Uyu mukino wagaragayemo ubushyamirane bwa Hategekimana Bonheur ufatira Rayon Sports na bagenzi be barimo kapiteni, Rwatubyaye Abdoul biturutse ku gitego cya Gatatu cy’abashinzwe umutekano cyatsinzwe na Kayitaba Bosco.
Uyu munyezamu yagaragaye avugana nabi na ba myugariro be barimo Mucyo Didier Junior na Rwatubyaye Abdoul.
Amakuru UMUSEKE wamenye nyuma y’uyu mukino, avuga ko uyu munyezamu yashenguwe n’ukuntu Rwatubyaye akora amakosa agaruka kenshi ariko ntahwiturwe yaba n’abatoza ndetse na bagenzi be bameze nk’abamutinya.
Umwe mu nshuti za hafi z’uyu munyezamu, yabwiye UMUSEKE ati “Bonheur bamufashe nk’umuntu udashobotse kandi we ababazwa n’ukuntu amakosa yose Abdoul akora nta n’umwe ujya umubwira kandi n’i Rusizi bivugwa ko yabatsindishije igitego.”
Uyu yakomeje avuga ko n’ubwo uyu munyezamu ashinjwa na bagenzi be guhora ababwira nabi kenshi iyo bari mu kibuga, ariko abenshi muri iyi kipe bamufata nk’udashobotse kandi nyamara hari imikino yitwara neza.
Ibi birahita bituma Bonheur arebana nabi na bagenzi be basa n’abafashe uruhande rwo kumwereka adashobotse.
Amakuru avuga ko abatoza ba Rayon Sports, bamaze guhana uyu munyezamu. Bivugwa ko ashobora kutazakina umukino w’umunsi wa 28 wa shampiyona iyi kipe izakira Gorilla FC ku Cyumweru tariki 7 Gicurasi 2023.
- Advertisement -
UMUSEKE.RW
