Ubwo hasozwaga imikino ya nyuma muri shampiyon ya Handball, rwabuze gica mu mvururu zikomeye hagati ya Gicumbi Handball Club na Police Handball Club bituma igikombe kidatangwa.
Ku Cyumweru tariki 02 Nyakanga 2023, ni bwo hagombaga gusozwa umwaka w’imikino 2022/2023 muri shampiyona ya Handball.
Mu bindi byiciro byose imikino yarangiye, ndetse hanamenyekana izegukanye ibikombe ariko mu cyiciro cya Mbere mu bagabo ntibirasobanuka.
Habanje umukino wahuje Kiziguro Women SS yegukanye igikombe cya shampiyona mu cyiciro cy’abagore, itsinze Nyamasheke ibitego 37-19.
Bigeze mu bagabo biba ingume. Ubwo haburaga amasegonda atanu gusa ngo umukino urangire, Gicumbi HC na Police HC zanganyaga ibitego 36-36.
Ikipe y’i Gicumbi yabonye penaliti ariko Komiseri w’umukino avuga ko yabonetse umukino warangiye kuko iminota yari yarangiye.
N’ubwo abakomiseri bavugaga ko iminota y’umukino yarangiye, umusifuzi we yavugaga ko ku isaha ye itararangira.
Ibi byatumye habaho kutumvikana ku cyemezo cy’umusifuzi ndetse haba imvururu zatumye abayobora Ishyirahamwe Nyarwanda rya Handball, Ferwahand, bajya mu kibuga ariko ntacyo byatanze.
Ubusanzwe iyo amakipe anganyije ku mukino wa nyuma, akina iminota y’inyongera ariko Gicumbi yabihakaniye kure bitewe no kuba banze ko itera penaliti yari ibonye.
- Advertisement -
Hanzuwe ko iki kibazo kijyanwa mu Kanama gashinzwe gukemura amakimbirane muri Ferwahand, ngo kajye kukigeho neza hifashishijwe ibimenyetso ubundi ikipe yarenganyijwe ikazarenganurwa biciye mu mucyo.
Umwanya wa gatatu mu Cyiciro cya Mbere cy’Abagabo, watwawe na APR HC yatsinze ES Kigoma ibitego 31-24.
Mu Cyiciro cya Kabiri cy’Abagabo, igikombe cyatwawe na UR Rukara yatsinze Gorillas HC ibitego 29-25.
UMUSEKE.RW
