Bamwe mu banyamuryango b’Ikigo cy’Imari iciriritse cya ‘Umurimo Finance Ltd’ ishami rya Kagano mu karere ka Nyamasheke, bavuga ko bahangayikishijwe no kuba hashize amezi atanu bajya kubikuza amafaranga yabo ntibayahabwe.
Aba baturage babwiye UMUSEKE ko ari ikibazo cy’ihuzanzira (connection)ridahari, bibaza aho bipfira mu gihe kubitsa byo bikunda.
Umwe mu baturage avuga ko yangiwe kubikuza amafaranga yo kwishyurira umunyeshuri ayafite muri banki.
Ati”Muri iyi banki nari mpari mbere y’ubunani, nje gushaka amafaranga yo kwishyurira umwana ku ishuri. Nyuma bambwiye ko nta huzanzira rya interineti zihari ariko iyo uyazanye barayemera“.
Mugenzi we yavuze ko iki kibazo cyatangiye kuva muri Nzeri umwaka ushize.
Ati”Ushaka kubikuza bakakubwira ko nta huzanzira,ukagenda .”
Uyu akomeza agira ati “Byatangiye umwaka ushize mu kwa cyenda kugeza n’ubu mu kwambere,turifuza ko bazikora tukabona amafaranga yacu”.
Uyu we yibaza uburyo hari ihuzanzira ribemerera kwakira amafaranga yo kubitsa ariko iryo kuyasohora ntirikunde.
Ati”Ikibazo urabitsa bakakira amafaranga, wajya kuyabikura ngo nta konegisiyo(connection), ngo kubikuza ntibikunda,ibibazo ni byinshi ni babikore tubone amafaranga yacu“.
Amakuru UMUSEKE wamenye ni uko mbere yo muri Nzeri 2023 babitsaga bakanabikuza bakoresheje uburyo bwa telefoni bigakunda,ariko ubu nabyo byarahagaze.
- Advertisement -
Umuyobozi w’ Umurimo Finance Ltd ishami rya Kagano,Vugayabagabo Vivine,ahakana ko kimaze amezi atanu, yemera ko iki kibazo kigiye kumara ibyumweru bibiri, nubwo atatangaje igihe kizaba gikemukiye ngo kuko bari gushaka uko cyakemuka vuba.
Ati”Ibyumweru bibiri biri hafi kugera dufite ikibazo seriveri y’Umurimo Finance ni i Rusizi ntibasha kwakira umuriro muri iki cyumweru batubwira ko bari kubikurikirana“.
Iki kigo gitanga servisi z’imari zirimo kubitsa, kubikuza ndetse n’inguzanyo zibafasha abaturage kwiteza imbere.
MUHIRE Donatien
UMUSEKE.RW/NYAMASHEKE
