Inzego z’Umutekano za Uganda zongeye gufungira mu rugo, Robert Kyagulanyi (Bobi Wine) utavuga rumwe n’ubutegetsi bwa Perezida w’iki gihugu, Yoweri Kaguta Museveni.
Mu gitondo cyo kuri uyu wa Kane tariki ya 18 Mutarama 2024, abasirikare n’abapolisi ba Uganda bazindutse bagose urugo rwa Robert Kyagulanyi usanzwe uri no mu bagize Inteko Ishinga Amategeko y’iki gihugu.
Kuri uyu wa kane, abanyapolitiki batavuga rumwe n’ubutegetsi bari barateguye imyigaragambyo yo kwamagana imiterere mibi y’imihanda muri Uganda.
Uyu muhanzi wahindutse umunyapolitiki, yavuze ko abapolisi n’abasirikare bamubujije kuva iwe i Magere, mu majyaruguru y’umurwa mukuru Kampala.
Bobi Wine yanditse ku mbuga nkoranyambaga ko “Igisirikare n’abapolisi b’ibigwari bagose urugo rwacu badushyira mu rugo ariko imyigaragambyo irakomeje.”
Yasabye ubutegetsi bwa Museveni gutunganya imihanda, kurekura imfungwa za Politiki no guha uburenganzira abanya-Uganda.
Abatavuga rumwe n’ubutegetsi bahamagarira Abagande gukomeza imyigaragambyo, basaba ko leta yafata ingamba zo gukemura ibibazo by’imihanda mibi.
NDEKEZI JOHNSON / UMUSEKE.RW
