Ikipe ya Rayon Sports yatsinzwe na Musanze FC igitego 1-0, mu mukino w’umunsi wa 22 wanagaragayemo impanuka ikomeye ya rutahizamu Rudasingwa Princes wagonganye na myugariro Muhire Anicet.
Wari umukino w’umunsi wa 22 wa Shampiyona y’u Rwanda wabereye kuri Kigali Pelé Stadium kuri uyu wa Gatanu, tariki ya 23 Gashyantare 2023, Saa kumi n’ebyiri z’ijoro.
Abakunzi ba Gikundiro nk’uko bisanzwe, ni bo bari benshi muri Stade, batiza umurindi ikipe ya bo.
Rayon Sports yatangiranye imbaraga ku buryo ku munota wa kane w’umukino yageze imbere y’izamu ariko Tuyisenge Arsène ananirwa gushyira mu izamu umupira, ba myugariro ba Musanze FC bawukuraho.
Ikipe ya Musanze FC yahise ibona ko irangaye yatsindwa igitego, maze itangira gukina ariko icungira ku mipira yihuta inyuze kuri Solomon Adeyinka wari mwiza kuri uyu mukino.
Ku munota wa 12 Rayon Sports yabonye koruneri enye zikurikiranya zashoboraga kuvamo igitego, Charles Bbaale azitereramo ishoti ariko umunyezamu Muhawenayo Gad awukuramo ashyiramo iya gatanu.
Umunyezamu wa Rayon Sports Khadime Ndiaye yakoze amakosa asohoka nabi ku munota wa 20 bihurirana n’uko Sulley Mohammed yamubonye ahita amurenza umupira habura gato ngo ujye mu rucundura.
Solomon Adeyinka yongeye guhusha igitego ku mupira yaherejwe ari mu rubuga rw’amahina ashaka gushyira mu izamu ariko ku bw’amahirwe make uca ku ruhande rw’izamu gato.
Impera z’igice cya mbere amakipe yombi yacitse intege atangira gukinira hagati mu kibuga ndetse kirangira zikinganya 0-0.
- Advertisement -
Intangiriro z’icya kabiri umutoza, Julien Mette, yahise akora impinduka akuramo Iradukunda Pascal, amusimbuza Iraguha Hadji kugira ngo yongere imbaraga hagati mu kibuga.
Umunota wa 65 wageze nta nimwe irabona mu izamu ariko zitangira kureba ko zabona amanota atatu. Icyo gihe Tuyisenge yageze mu rubuga rw’amahina yitura hasi, ariko umusifuzi Ruzindana Nsoro amusaba guhaguruka kuko nta penaliti yabayeho.
Umutoza wa Musanze FC, Habimana Sosthène yakoze impinduka akuramo Sulley Mohammed na Nduwayo Valeur, ashyiramo Tuyisenge Pacifique na Tinyimana Elissa.
Aba bombi bahise bafatanya babona igitego ku munota wa 75 gitsinzwe na Tuyisenge Pacifique aherejwe umupira na Tinyimana.
Impanuka ikomeye muri uyu mukino yagaragaye ku munota wa 89 ubwo Muhire Anicet wa Musanze FC yagonganaga na Rudasingwa Prince, bombi bitura hasi bigaragara ko bababaye cyane. Rutahizamu wa Rayon Sports yahise yihutanwa kwa muganga hifashishijwe imbangukiragutabara yari ku kibuga.
Muhire na we yakuwe mu kibuga ku ngobyi ntiyasubira mu kibuga ahita asimburwa na Uwiringiyimana Christophe, Mvuyekure Emmanuel asimbura Rudasingwa.
Muhire Anicet byarangiye ubuzima bukomeje kugorana ahabwa ubundi butabazi bw’imodoka isanzwe yinjiye mu kibuga imujyana kwa muganga hakiri kare.
Umukino warangiye Rayon Sports iburiye iwayo amanota atatu kuko yatsinzwe n’Ikipe yo mu Karere ka Musanze FC igitego 1-0.
Rayon Sports yagumanye umwanya wa kabiri n’amanota 42, mu gihe Musanze FC irusha rimwe iyikurikiye ku rutonde rw’agateganyo rw’umunsi wa 22 wa Shampiyona.
HABIMANA SADI/UMUSEKE.RW
