Urwego rushinzwe gutegura Shampiyona y’Icyiciro cya Mbere y’umupira mu Bagabo, Rwanda Premier League Board, rwamenyesheje abayobozi b’amakipe ko shampiyona izakomeza mu mpera z’iki cyumweru hakinwa umunsi wa munani.
Nyuma yo gukora inama hakemeranywa ko ikipe yose idafite abakinnyi byibura batatu kuzamura mu ikipe y’Igihugu, Amavubi, izakomeza gukina shampiyona hatabayeho ibirarane, amakipe yongeye kumenyeshwa ko mpera z’iki cyumweru izakomeza hakinwa imikino y’umunsi wa munani.
Nk’uko abayobozi b’amakipe y’icyiciro cya mbere yabimenyeshejwe, imikino y’umunsi wa munani, izakomeza guhera ku wa Gatanu tariki ya 1 Ugushyingo 2024. Ikipe ya Gasogi United izaba yakiriye Etincelles FC kuri Kigali Péle Stadium Saa Cyenda z’amanywa.
Ku wa Gatandatu tariki ya 2 Ugushyingo 2024, hateganyijwe imikino ine. Rayon Sports izaba yakiriye Kiyovu Sports Saa Kumi n’Ebyiri z’umugoroba kuri Kigali Péle Stadium. Indi mikino izakinwa kuri uyu munsi, izaba Saa Cyenda z’amanywa. Bugesera FC izkira Musanze FC, Police FC izakira Rutsiro FC mu gihe Amagaju FC azaba yakiriye Vision FC.
Bucyeye ku Cyumweru tariki ya 3 Ugushyingo 2024, hazakinwa imikino ine yose izakinwa Saa Cyenda z’amanywa. Marines FC izakira Muhazi United, Mukura VS izakira AS Kigali mu gihe Gorilla FC izaba yakiriye APR FC.
Rwanda Premier kandi, yamenyesheje abo bireba uko gahunda y’imikino y’umunsi wa Cyenda iteye. Yavuze ko iyi mikino izakinwa tariki ya 5,6 n’iya 7 Ugushyingo 2024. Tariki ya 5 Ugushyingo 2024, Kiyovu Sports izaba yakiriye Gasogi United Saa Cyenda z’amanywa.
Tariki ya 6 Ugushyingo 2024, hateganyijwe imikino itanu yose izakinwa Saa Cyenda z’amanywa. Bugesera FC izaba yakiriye Gorilla FC, Musanze FC izakira Rayon Sports, AS Kigali izakira Marines FC, Etincelles FC izakira Rutsiro FC mu gihe Muhazi United izaba yakiriye Amagaju FC.
Tariki ya 7 Ugushyingo 2024, hateganyijwe gukinwa imikino ibiri yombi izakinwa Saa Cyenda z’amanywa. Mukura VS izaba yakiriye Police FC mu gihe Vision FC izaba yakiriye APR FC.
UMUSEKE.RW
