Cucuri yahawe kuzakiranura abakeba

Umusifuzi mpuzamahanga, Ishimwe Jean Claude uzwi ku izina rya “Cucuri”, yahawe kuzayobora umukino w’abakeba, uzahuza Rayon Sports na Kiyovu Sports.

Guhera kuri uyu wa Gatanu Saa Cyenda z’amanywa, haraba hakinwa imikino y’umunsi wa Munani ya shampiyona y’Icyiciro cya mbere y’umupira w’amaguru mu Bagabo.

Ikipe ya Gasogi United irakira Etincelles FC Saa Cyenda z’amanywa kuri Kigali Péle Stadium. Ni umukino wahawe Mulindangabo Moïse nk’umusifuzi wo hagati, Nsabimana Evaliste na Habumugisha Emmanuel baraba ari abasifuzi b’igitambaro mu gihe Musoni Henry araba ari umusifuzi wa Kane.

Umukino utegerejwe na benshi, ni uzahuza Rayon Sports na Kiyovu Sports ku wa Gatandatu tariki ya 2 Ugushyingo Saa Kumi n’Ebyiri z’umugoroba kuri Kigali Péle Stadium.

Uyu mukino wahawe abasifuzi babiri mpuzamahanga, bayowe na Ishimwe Jean Claude “Cucuri” uzaba ari hagati mu kibuga, Ishimwe Didier azaba ari umusifuzi w’igitambaro wa mbere, Maniragaba Valery azaba afite igitambaro ku rundi ruhande mu gihe Nshimyumuremyi Abdallah azaba ari umusifuzi wa Kane.

Kuri uyu munsi kandi hazaba hari gukinwa indi mikino itatu ya shampiyona izabera hanze ya Kigali.

Bugesera FC izaba yakiriye Musanze FC Saa Cyenda z’amanywa kuri Stade Mumena. Ni umukino uzayoborwa na Dushimimana Eric uzaba ari hagati mu kibuga.

Azungirizwa na Ndayambaje Hamdan na Nsabimana Patrick mu gihe Ishimwe Réne azaba ari umusifuzi wa Kane kuri uyu mukino.

Police FC izakira Rutsiro FC kuri Kigali Péle Stadium Saa Cyenda z’amanywa. Rulisa Patience ni we wahawe uyu mukino nk’umusifuzi wo hagati.

Azafashwa ku ruhande na Mugabo Eric na Karemera Tonny mu gihe Nshimiyimana Remy Victor azaba ari umusifuzi wa Kane.

Amagaju FC azakira Vision FC Saa Cyenda z’amanywa kuri Stade mpuzamahanga ya Huye. Uyu mukino wahawe Ngabonziza Dieudonné uzaba ari hagati.

Ngabo azungirizwa na Ndayisaba Saidi na Musabyimana Jean de Dieu, mu gihe Ugirashebuja İbrahim azaba ari umusifuzi wa Kane.

Ku Cyumweru tariki ya 3 Ugushyingo 2024, hazakinwa imikino itatu izahita yuzuza umunani y’uyu munsi wa Munani.

Marines FC izakira Muhazi United Saa Cyenda z’amanywa kuri Stade Umuganda. Ni umukino wahawe Uwikunda Samuel, azaba afatanya Safari Hamiss na Mukirisitu Ange Robert mu gihe Bigabo Frank azaba ari umusifuzi wa Kane.

Gorilla FC izakira APR FC kuri Kigali Péle Stadium. Akingeneye Hicham azaba afite ifirimbi hagati mu kibuga, Mutuyimana Dieudonné na Nsengiyumva Jean Paul, bazaba bari ku ruhande mu gihe Nsabimana Céléstin azaba ari umusifuzi wa Kane.

Mukura VS izaba yakiriye Vision FC Saa Cyenda z’amanywa kuri Stade mpuzamahanga ya Huye.

Uyu mukino wahawe Twagirumukiza Abdulkarim uzaba ari hagati. Azungirizwa na Karangwa Justin na Ruhumuriza Justin mu gihe Muhayeyezu Roberto azaba ari umusifuzi wa Kane.

Ikipe ya Gorilla FC iracyoboye urutonde rwa mbere by’agateganyo n’amanota 14, mu gihe iya nyuma ari Kiyovu Sports ifite amanota atatu.

UMUSEKE.RW