Umukuru w’Igihugu, Paul Kagame, yashimishijwe n’intsinzi ya Arsenal yo mu Bwongereza nyuma yo kunyagira Manchester City ibitego 5-1 mu mukino wa shampiyona.
Ku wa 2 Gashyantare 2025, ikipe ya Arsenal yari yakiriye Manchester City itozwa na Pep Guardiola. Ni umukino warangiye Abarashi batsinze ibitego 5-1 byatsinzwe na Lewis-Kelly, Nwaneri, Kai Havertz, Martin Odegaard na Thomas Partey.
Nyuma y’uyu mukino wanatumye Arsenal igabanya ikinyuranyo cy’amanota irushwa n’iya mbere, Umukuru w’Igihugu, Paul Kagame, abicishije ku rukuta rwe rwa X yahoze yitwa Twitter, yacyeje iyi kipe yahaye abakunzi ba yo ibyishimo.
Ati “Arsenal. Abarashi. Mwishyuke. Dukomereze aho.”
Ubusanzwe Umukuru w’Igihugu asanzwe ari umukunzi w’iyi kipe y’i Londres kuva igitozwa n’Umufaransa, Arsène Wenger ubu wahawe akazi muri FIFA.
Iyi kipe y’i Londres, yahise igumana umwanya wa kabiri n’amanota 50 mu gihe Liverpool ya mbere, iyirusha atandatu.
Umukuru w’Igihugu asanzwe ari umukunzi wa Arsenal kuva ku ubwo Arsène Wenger yari akiri umutoza wa yo. Ikirenze kuri ibyo ariko, iyi kipe inasanzwe ari Umufatanyabikorwa w’u Rwanda mu kwamamaza Visit Rwanda.
UMUSEKE.RW
