U Burusiya bwatangaje ko abasirikare babwo bo mu mutwe wa ‘African Corps’ bafashije ingabo za Niger guhagarika umugambi wari ugamije guhirika ubuitegetsi bwa Perezida Gen Abdourahmane Tiani.
Mu gitondo cyo ku wa Gatandatu tariki ya 29 Kanama 2026, mu bice bitandukanye by’umurwa mukuru wa Niger, Niamey humvikanye amasasu yavugiraga mu gace karimo ingoro ya Perezida. Ubuyobozi bwa Niger bwatangaje ko uwo wari mugambi wo guhirika ubutegetsi.
Minisiteri y’Ububanyi n’Amahanga y’u Burusiya yatangaje ko ingabo za Niger “zafashijwe n’abasirikare bo muri African Corps” mu guhangana n’abagerageje guhungabanya ubutegetsi.
U Burusiya bwavuze ko buzakomeza gufasha Niger mu kurwanya imitwe yitwaje intwaro, ariko ko ubutegetsi buri mu maboko y’inzego zemewe ziyobowe na Perezida Gen Abdourahmane Tiani.
Ihuriro ry’ibihugu bya Sahel, rigizwe na Niger, Mali na Burkina Faso bikaba n’ibihugu bifatanyije n’u Burusiya mu rwego rw’umutekano, ryamaganye uwo mugambi, rivuga ko ari “ubuhemu bwakozwe n’itsinda ry’abasirikare” bashakaga guhungabanya umutekano w’igihugu.
Nta mubare w’abasirikare bagize uruhare muri uwo mugambi cyangwa abahasize ubuzima watangajwe.
Ubutegetsi muri Niger buvuga ko inzego z’umutekano zakajije umutekano ku hantu h’ingenzi muri Niamey, harimo ku kibuga cy’indege no hafi y’ingoro ya Perezida.
Gen Abdourahamane Tiani ari ku butegetsi kuva mu 2023 nyuma yo guhirika ubutegetsi bwa Mohamed Bazoum amushinja intege nke mu buyobozi ndetse no kudaha abaturage umutekano
MUGIRANEZA THIERRY/ UMUSEKE.RW
