Gen Christian Tshiwewe Songesa wabaye Umugaba Mukuru w’Ingabo za Congo ku butegetsi bwa Perezida Felix Antoine Tshisekedi ategerejwe mu rukiko we n’abandi 9 baregwa mu rubanza rumwe.
Tshiwewe n’abo bandi bakurikiranyweho icyaha cyo gucura umugambi, n’ubugambanyi bategerejwe kuburana mu Rukiko Rukuru rwa gisirikare i Kinshasa.
Urubanza rw’aba bantu bantu icumi, barimo abayobozi benshi bo mu nzego zo hejuru mu ngabo za Congo biteganyijwe ko bazitaba urukiko ku wa kane, tariki ya 04 Kamena, 2026.
Gen Christian Tshiwewe Songesa, wahoze ari Umugaba Mukuru w’ingabo za Congo, ku butegetsi bwa Tshisekedi, ayoboye urutonde rw’abaregwa barimo Gen John Numbi Banza Ntambo, Gen.Maj Maurice Nyembo Kufi, n’abandi barimo Brig.Gen Chinyabuuma Kamukinde, Brig.Gen John Ngoy wa Kabila, na Brig.Gen John Sangwa Muhemedi.
Muri uru rubanza harimo ba Colonel batatu, Col. Guy Mukombozi Zahinda, Col Pathy Sangwa Lumbu, na Col Christophe Tshibangu Kenge.
Undi ni umusivili witwa Pascal Nyembo Muyumba.
Baregwa ibyaha bikomeye birimo ubugambanyi, ubuhemu, iterabwoba, gukwirakwiza ibihuha, kurenga ku mategeko, gutorokera mu mahanga, gutunga intwaro z’intambara n’amasasu mu buryo butemewe, no gushishikariza abasirikare kugumuka.
Ubutegetsi bwa Perezida Felix Tshisekedi mu gihe gishize bwakunze gufunga abasirikare bo hejuru bahoranye ijambo ku butegetsi bwa Perezida Joseph Kabila, hari n’abagiye bapfira muri gereza.
UMUSEKE.RW
