Intambara yo mu Burasirazuba bwo Hagati yongeye kubura bundi bushya, ibihugu bya Israel na Iran byongeye kurasana hakoreshejwe misile, ‘drones’ n’indege z’intambara.
Ibi bitero bishya byatangiye mu ijoro ryo ku Cyumweru tariki ya 7 Kamena 2026. Buri ruhande ruvuga ko ari rwo rwabanje guterwa, ‘rugasubiza rwirwanaho’.
Isreal ivuga ko yarashe ibisasu mu mijyi yo muri Iran irimo Tehran, Tabriz na Isfahan nyuma y’uko Iran yari yarashe za misile nyinshi mu mijyi ya Israel.
Ingabo za Iran zishinzwe kurinda impinduramatara za Kisilamu (IRGC) zavuze ko zarashe misile mu bigo bya gisirikare bya Israel birimo ikitwa Nevatim and Tel Nof air base.
IRGC yavuze ko iri gusubiza ibitero bya Isreal byibasiye ibikorwa bya gisirikare birimo na radars zayo.
Ku rundi ruhande hari ibitangazamakuru byememeza ko ari Iran yatangije ibi bitero bishya kuri Isreal mu rwego rwo kwihorera ko Israel yari yakomeje kurasa muri Liban/Lebanon.
Ubutegetsi bwa Iran buvuga ko amahoro atazigera aboneka mu gihe cyose Israel ikomeza kurasa i Beirut muri Liban.
Radiyo y’Igisirikare cya Israel yatanze amatangazo isaba abari mu mutwe w’inkeragutabara kugaruka mu ngabo byihutirwa.
Iyi radiyo kandi ivuga ko ibitero byishya bizamara iminsi.
Umutwe w’Abarwanyi ba Aba-Houthi bo muri Yemen wavuze ko winjiye mu ntambara, kandi ko bari bugabe ibitero kuri Israel.
Aba barwanyi mu butumwa bwo kuri Telegram bavuze ko bahagaritse byuzuye ingendo za Israel zo mu mazi y’Inyanja Itukura ko kandi batazihanganira kubona abaturage bapfa muri Palestine, Gaza, Iran, Lebanon na Iraq.
Amahanga yatangiye gukomakoma ngo impamde zombi zihagarike imirwano.
Israel na Iran byaherukaga kurwana muri Mata 2026 mu bitero bya gisirikare byarimo na Leta zunze Ubumwe za Amerika, ariko ingabo za Israel zibivamo mbere.
Ubu hari ibiganiro by’ubuhuza ngo Amerika na Iran bagirane amasezerano yatuma intambara ihagarara ndetse na Iran ikemera gufungura umuhoro wa Hormuz, ifungwa ryawo ryateje akaga Isi.
MUGIRANEZA THIERRY/ UMUSEKE.RW
