Abaturage ibihumbi bahuriye hamwe mu mujyi wa Goma mu Burasirazuba bwa Congo, bakora imyigaragambyo yahamagajwe n’abo mu miryango itari iya leta mu bice bigenzurwa na AFC/M23.
Ku mugoroba wo ku wa Mbere amatangazo yari yacicikanye ko kuri uyu wa Kabiri haba imyigaragambyo mu bice bigenzurwa na AFC/M23 by’umwihariko mu mijyi minini nka Goma muri Kivu y’Amajyaruguru na Bukavu muri Kivu y’Amajyepfo.
Ibihumbi by’abaturage kuri uyu wa Kabiri bamanutse mu mihanda cyane i Goma, aho bagendaga baririmba amagambo ngo ntidushaka ko itegeko nshinga rya Repubulika rihinduka.
Imyigaragambyo yateguwe n’ihuriro ryitwa “Société Civile Plurielle” yahereye ku kibuga cya OZACAF, ikomereza mu mihanda mikuru y’umujyi wa Goma.
Uretese kwamagana gahunda ya Perezida Antoine Felix Tshisekedi, yo guhindura Itegeko Nshinga, aba bari mu myigaragambyo banamaganye ubwicanyi bukomeje gukorerwa abasivile mu gace ka Beni mu Ntara ya Ituri, bukaba bushinjwa umutwe wa ADF, ukorana n’indi mitwe y’iterabwoba.
Banamaganye ubwicanyi n’urugomo rukorwa mu misozi ya Minembwe muri Kivu y’Epfo.
Aba bari mu myigaragambyo bamaganye ibihano byafatiwe abayobozi b’inyeshyamba za AFC/M23 bikozwe na Leta zunze Ubumwe za America n’Ubumwe bw’Uburayi.
Ku rundi ruhande hari abavuga ko iyi myigaragambyo yateguwe n’abayobozi ba AFC/M23 ariko bayitirira imiryango itari iya Leta.
Umwe mu baturage bari mu myigaragambyo yavuze ko bifuza amahoro, ko bifuza ko habaho ibiganiro aho gukoresha ibihano ku bantu bashaka amahoro.
Itegeko ryo guhindura itegeko nshinga rya Repubulika iharanira Demokarasi ya Congo rishyigikiwe na benshi mu bashaka ko Perezida Felix Tshisekedi aguma ku butegetsi, mu gihe abatavuga rumwe na we bagaragaje ko bazakomeza kurwana intambara yo kuburizamo uwo mu gambi mu buryo bwose burimo n’imyigaragambyo.
UMUSEKE.RW
