Perezida Kagame yakiriye muri Village Urugwiro Ambasaderi Mushya wa Oman n’uwa Nouvelle-Zélande mu Rwanda.
Abamushyikirije impapuro zibemerera guhagararira ibihugu byabo mu Rwanda ni Nasra bint Salim bin Mohammed Al Hashmi wa Oman na Olivia Charlotte Owen wa Nouvelle-Zélande.
U Rwanda, Nouvelle-Zélande na Oman n’ibihugu by’inshuti ndetse ibihugu byombi bifitanye amasezerano.
U Rwanda na Oman byasinyanye amasezerano ane y’ubufatanye mu ntangiriro za Mutarama 2026, agamije guteza imbere ubwikorezi, ibikorwaremezo n’ikoranabuhanga.
SalamAir yo muri Oman iheruka gutangiza ingendo zihuza Muscat na Kigali.
Mu birebana n’iterambere, Urwego rw’u Rwanda rw’Iterambere (RDB) n’Ikigo gishinzwe gucunga Ibibuga by’Indege muri Oman basinyanye amasezerano agena ishoramari rizakorwa ahazengurutse Ikibuga Mpuzamahanga cya Kigali cy’i Bugesera.
Mu birebana n’ikoranabuhanga, Minisiteri y’Ikoranabuhanga na Inovasiyo (MICT) y’u Rwanda n’iya Oman, byashyize umukono ku masezerano agamije kwakira santeri y’amakuru y’ikoranabuhanga, serivisi zo kubika amakuru mu buryo bwagutse, kubaka ibikorwa remezo by’ikoranabuhanga no kwimakaza ikoranabuhanga ry’Ubwenge Buhangano (AI).
Minisitiri w’Ubwikorezi, Itumanaho n’Ikoranabuhanga Eng. Bin Said bin Hamoud al Maawali, yavuze ko amasezerano mashya yashyizweho umukono ajyanye n’intego ya Guverinoma ya Oman yo kurushaho kwagura ubufatanye mu guteza imbere ubwikorezi bw’abantu n’ibintu ndetse n’ubw’ubucuruzi, kwimakaza ikoranabuhanga rigezweho n’iterambere, hibandwa ku mikoranire na Afurika y’Iburasirazuba.
Ni mu gihe U Rwanda na Nouvelle-Zélande (New Zealand) na byo bifitanye umubano mwiza n’ubutwererane mu nzego zitandukanye bw’ibihugu byombi.
Umubano wa dipolomasia hagati y’ibi bihugu byombi watangiye ku mugaragaro ku wa 17 Mata 2012.
Ibihugu byombi bihuriye ku kuba Abanyamuryango b’Umuryango w’Ibihugu bikoresha Ururimi rw’Icyongereza (Commonwealth).
Nouvelle-Zélande izwiho kuba imbere mu buryo bugezweho bw’ubuhinzi n’ubworozi bw’amatungo cyane cyane umusaruro w’amata. Ibihugu byombi bikorana mu guhana ubumenyi n’ikoranabuhanga rya kijyambere ryubaka ubwo buhinzi n’ubworozi mu Rwanda.
UMUSEKE.RW
