Itorero Indatirwabahizi mu gitaramo ngaruka kwezi kitwa Kigali Dutarame, ryatanze ibyishimo ku bagenda n’abakorera mu Biryogo ahazwi nko mu Marangi.
Ni igitaramo cyabaye ku mugoroba wo kuri uyu Gatanu tariki ya 31 Nyakanga 2026, aho iri torero Indatirwabahizi ku bufatanye n’Umujyi wa Kigali, rikora ibitaramo ngaruka kwezi hagamijwe gususurutsa abatuye Umujyi wa Kigali ndetse hagatangwa n’ubutumwa butandukanye.
Ni igitaramo cyaranzwe n’ubwitabire buri hejuru aho umubare munini w’abitabiriye iki gitaramo ari urubyiruko.
Itorero Indatirwabahizi ryasusurukije abakitabiriye mu mbyino zitandukanye z’umuco nyarwanda harimo no kuvanga imbyino zo mu bihugu byo mu karere.
Usibye iri torero, muri iki gitaramo abahanzi barimo Social Mula,Fireman, bagize uruhare mu gutuma abatuye mu biryogo basusuruka, aho baririmbye indirimbo zitandukanye zakunzwe mu myaka yashize .
Muri iki gitaramo kandi itsinda rizwi nk’Abapansiyone, babyina indirimbo za karahanyuze ndetse bakaba bambara imyenda yo mu myaka yo hambere nabo batanze ibyishimo bidasanzwe muri iki gitaramo.
Abapansiyone bagezweho muri iki gihe by’umwihariko abakunda indirimbo zo hambere zibanda ku muziki ubyinitse.
Aba baba bambaye ibitenge ku bagore . Ni mu gihe abagabo baba bambaye imyenda n’ingofero zihariye.
Umunyamabanga Nshingwabikorwa w’Itorero Indatirwabahizi akaba ari n’umutoza waryo, Hategekimana Abubakar Maso , avuga ko kuzana iki gitaramo mu Biryogo bigamije kurushaho kwegereza ibitaramo abantu batuye umujyi wa Kigali.
Ati “ Iyi gahunda ni gahunda y’Umujyi wa Kigali y’Umujyi ushyushye. Ni ibyiza byose tubona ariko bikagerekwaho n’ibitaramo by’umwihariko ibitaramo Nyarwanda ariko bishobora kunganirwa n’ibindi bitaramo.”
Akomeza ati“Kubizana hano, ni umwanzuro w’Umujyi wa Kigali urangajwe imbere n’abayobozi. Bavuga ngo muri ibyo bitaramo bya buri kwezi, bigomba kubera ahantu hatandukanye mu Mujyi wa Kigali. Ubundi byaberaga muri Car free zone, ariko uyu munsi twahisemo kubizana hano kuko mu Marangi hahurira abantu batandukanye baturutse hirya no hino baje gusabana.”
Yavuze ko umwihariko w’iki gitaramo bahisemo kuvanga umuco Nyarwanda n’indi mico mvamahanga.
Yongeraho ko bateganya gutoza abakiri bato binyuze muri gahunda yiswe ‘ Uruhongore rw’Umuco’, aho abana batozwa umuco Nyarwanda, bakabarinda ibintu bishobora kubarangaza.
Umuvugizi w’Umujyi wa Kigali, Emma Claudine Ntirenganya, wari witabiriye iki gitaramo, yasabye abantu kwirinda ibiyobyabwenge n’izindi nzoga zose zitujuje ubuziranenge.
Ati”Ubu turashaka kuzana Abanya-Kigali mu rugendo shuri hano, kuza kwiga uburyo bagira’ Vibes’ batanyweye inzoga, batanyweye ibiyobyabwenge. Ubu n’ibirori byose tugiye kujya tubizana hano. Vibes nta biyobyabwenge irashoboka.”
Emma Claudine yongeye gushimangira ko kwenga umutobe,ikigage n’urwagwa byemewe ahubwo ko ikitemewe ari ukubyenga nabi.
Ati “Abantu bafashe uburyo twenga mu buryo bwa gakondo,batangira kubyenga nabi, babivangamo ibintu byinshi. Uyu munsi uje kunsura, nkakwakiriza urwagwa ,ukamenya ko rurimo amatafari,warunywa? abantu baragiye batangira kuvanga ibintu bitemewe, ibitoki bibabana bicye cyangwa baranabyirengagiza kugira ngo bakore ibintu mu buryo bworoshye, bashyiramo ibintu byica abantu. Umusaza( Perezida) aradukunda, ntabwo ashobora kwemera ko abantu banywa ibintu bibica.”
Yasabye abantu kujya babanza kumenyesha ubuyobozi kugira ngo hakorwe ubugenzuzi .
Iki gitaramo cy’Indatirwabahizi ku bufatanye n’Umujyi wa Kigali kibaye ku nshuro ya Gatanu ndetse biteganyijwe ko kizakomeza kuba buri mu mpera y’ukwezi.
UMUSEKE.RW
