Uwari Visi Perezida wa AS Kigali muri Komite iyobowe na Rindiro Jean Chrysostome, Kankindi Anne-Lise Lida, yamaze kuva muri izo nshingano.
Mu Ugushyingo 2025, ni bwo hatowe Komite Nyobozi ya AS Kigali, biciye mu Nama y’Inteko Rusange yahuje Abanyamuryango bayo.
Ni Komite iyobowe na Rindiro Jean Chrysostome, wari wungirijwe na Kankindi Anne-Lise Lida nka Visi Perezida we.
Amakuru yizewe UMUSEKE wamenye ukuye mu banyamuryango b’iyi kipe iterwa inkunga n’Umujyi wa Kigali, ni Kankindi yamaze kwegura kuri izi nshingano yari afite.
Uwiduhaye amakuru yagize ati “Nibyo. Batubwiye ko yeguye ku nshingano za Visi Perezida. Ubwo mu Nteko Rusange bazadusangiza ibaruwa yanditse.”
Abandi bari muri iyi Komite Nyobozi, ni Habanabakize Fabrice usanzwe ari Umunyamabanga Mukuru, Habiyakare Chantal Ushinzwe umutungo na Sangno Yves Ushinzwe Amategeko.
Ku Cyumweru, tariki ya 17 Kanama 2026, hateganyijwe Inama y’Inteko Rusange isanzwe izahuza Abanyamuryango ba AS Kigali.
Ni Inteko Rusange ifite ingingo z’ibyigwa ebyiri zirimo kuzuza inzego no gutanga icyerekezo cy’amakipe ashamikiye kuri AS Kigali.
UMUSEKE.RW
