Ubushakashatsi ngarukamwaka ku miyoborere buzwi nka Rwanda Governance Scorecard (RGS), bukorwa n’Urwego rw’Igihugu rw’Imiyoborere (RGB), bwagaragaje ko umutekano ari rwo rwego abaturage banyuzwe na rwo kurusha izindi n’amanota 90,15%, mu gihe ireme rya serivisi ryaje ku mwanya wa nyuma n’amanota 68,48%.
Raporo ya 13 ya RGS yasohotse ku wa 22 Ukwakira 2026, igaragaza ko mu byiciro umunani by’imiyoborere byasuzumwe, bitanu byagize amanota ari hejuru ya 80%, mu gihe ibindi bitatu byagize amanota ari hagati ya 60% na 79,99%.
Icyiciro cy’umutekano n’ituze rusange cyaje ku mwanya wa mbere n’amanota 90,15%. Mu baturage babajijwe, 99% bagaragaje ko bafitiye icyizere Ingabo z’u Rwanda, 97,4% bafitiye icyizere Polisi y’Igihugu, naho 97,7% banyuzwe n’umutekano w’igihugu.
Kurwanya ruswa, gukorera mu mucyo no kubazwa inshingano byaje ku mwanya wa kabiri n’amanota 85,80%, bikurikirwa n’iyubahirizwa ry’amategeko ryagize 85,47%.
Uruhare rw’abaturage mu miyoborere no kudaheza byagize 84,72%, mu gihe uburenganzira bwa politiki n’ubwisanzure bw’abaturage byagize 81,56%.
Mu byiciro bitatu byagize amanota ari munsi ya 80%, imiyoborere y’ubukungu n’ibigo by’ubucuruzi yagize 73,28%, ishoramari mu iterambere ry’abaturage n’imibereho myiza rigira 68,55%, naho ireme rya serivisi zihabwa abaturage rigira 68,48%.
Nubwo ishoramari mu iterambere ry’abaturage n’imibereho myiza ryaje ku mwanya wa karindwi, ni ryo ryazamutseho amanota menshi, ava kuri 64,69% agera kuri 68,55%.
Ku rundi ruhande, ireme rya serivisi zihabwa abaturage ryagabanutseho amanota 3,25, riva kuri 71,73% rigera kuri 68,48%.
RGB igaragaza ko iri gabanuka ryatewe ahanini n’imikorere ya serivisi zitangwa hifashishijwe ikoranabuhanga, zirimo izo gutanga ibirego mu nkiko n’izitangirwa ku rubuga Irembo.
Raporo igaragaza ko 81,80% by’abaturage babajijwe banyuzwe na serivisi za Irembo, mu gihe abishimiye serivisi zo gutanga ibirego mu nkiko hifashishijwe ikoranabuhanga bari 65,40%.
Mu zindi serivisi zasuzumwe, 53,70% by’abaturage babajijwe banyuzwe n’iz’ubuhinzi, 50,90% banyuzwe n’izijyanye n’ubutaka, ibidukikije n’imiturire, naho 63,90% banyuzwe n’iz’ubuzima.
MUGIRANEZA THIERRY/ UMUSEKE.RW
