Abakora ubucuruzi bwambukiranya imipaka, abakora mu nganda n’abandi bafite ibyago byo kwandura vuba basaga 10.000 bo mu Karere ka Rubavu batangiye guhabwa urukingo rwa COVID-19.
Ni igikorwa cyatangiye mu gitondo cyo kuri uyu wa Kabiri tariki ya 13 Nyakanga 2021.
Gahunda yo gutanga urukingo rwa COVID-19 ibaye nyuma y’aho aka Karere muri Gicurasi kari kamaze iminsi gahanganye n’ingaruka z’iruka ry’ikirunga cya Nyiragongo.
Muri iki gikorwa kizamara iminsi ibiri, Umuyobozi w’Akarere wungirije Ushinzwe Ubukungu n’Iterambere, Nzabonimpa Deogratias yabwiye Umuseke ko hahereye ku bacuruzi kuko bari mu bafite ibyago byinshi byo kwandura.
Yagize ati “Abacuruzi bahura n’abantu benshi, bagahura n’abaguzi babo, bahura n’Isi yose. Urumva bari mu bafite ibyago byinshi byo kwandura.”
Yakomeje agira ati “Abo turi gukingira n’abamaze gukingirwa ndagira ngo twongere tubibutse ko COVID-19 ishobora kwihinduranya, rero birasaba ko amabwiriza yo kwirinda COVID-19 akomeza kubahirizwa kandi bayubahiriza nk’abatakingiwe. Ibyo bifasha kutagira ibyago byo kwandura ngo babe bakwanduza abandi.”
Nzabonimpa yasabye abaturage batarakingirwa gukomeza kubahiriza amabwiriza yo kwirinda icyorezo cya Coronavirus 100% .
Ishusho ihagaze ite mu minsi ine gusa?
- Advertisement -
Imibare ya Minisiteri y’Ubuzima yerekana ko mu minsi ine gusa abamaze kurwara COVID-19 bagera ku 3 066, Abakize bo ni 3 165, Abamaze gupfa ni 61 naho abamaze gukingirwa ni 3 842.
https://p3g.7a0.myftpupload.com/ku-munsi-umwe-abantu-22-bishwe-na-covid-19-abanduye-bashya-ni-772.html
REBA YouTube Channel UMUSEKE TV video nziza nk’iyi. UKORA LIKE SHARE na COMMENT
TUYISHIMIRE Raymond / UMUSEKE.RW