Ikipe ya Real Madrid ibifashijwemo na Rodrygo, Marco Asensio na Karim Benzema, yegukanye igikombe cya 35 cya shampiyona yo muri Espagne.
Ni nyuma y’umukino w’umunsi wa 34 wa shampiyona, iyi kipe yatsinzemo Espanyol ibitego 4-0. Ibitego bya Real Madrid byatsinzwe na Rodrygo watsinze bibiri, Marco Asensio watsinze kimwe na Karima Benzema watsinze kimwe. Iyi kipe yahise igira amanota 81 mu gihe hasigaye imikino ine ngo shampiyona irangire kandi Sevilla ya Kabiri ifite amanota 64. Ibi bisobanuye ko niyo iya Kabiri yatsinda imikino yose isigaye, Real itsindwa, yagira amanota 76 gusa.
Iyi kipe imaze kuba ubukombe ku Isi, yegukanaga igikombe cya 35 cya shampiyona yo mu gihugu cya Espagne, mu gihe umutoza mukuru wayo, Carlo Ancelotti yahise aca agahigo ko kuba ari we mutoza umaze kwegukana ibikombe muri shampiyona eshanu zikomeye ku mugabane w’i Burayi.
Uyu mutoza, yegukanye shampiyona mu Butaliyani (Juventus), u Bufaransa (PSG), u Budage (Bayern Munchen), u Bwongereza (Chelsea) na Espagne (Real Madrid). Aha hose yagiye ahegukana igikombe cya shampiyona muri buri kipe.
Real Madrid, itegereje umukino wa ½ wo kwishyura izakiramo Manchester City mu marushanwa y’amakipe yabaye aya Mbere iwayo (Uefa Champions League). Umukino ubanza iyi kipe yatsindiwe mu Bwongereza ibitego 4-3.
Iyi kipe ni yo ibitse ibikombe byinshi bya Uefa Champions League, kuko ibitse ibigera kuri 13 mu kabati kayo.
HABIMANA SADI/UMUSEKE.RW
