Umuhanzikazi nyarwanda Aulah Off usanzwe afashwa na The Beam Entertainment yakoze indirimbo iri mu mujyo nk’uw’iziharawe n’abahanzi nyarwanda muri ibi bihe ziswe ko zirimo amagambo y’ibishegu n’amashusho ateye inkeke, iyi ndirimbo yateje ururongoro ku mbuga nkoranyambaga.
Hashize iminsi bamwe mu bahanzi nyarwanda bijujutirwa kubera kuririmba indirimbo zirimo amagambo yiswe ibishegu aba aganisha ku gutera akabariro.
Ayo magambo aganisha ku irari ryo mu mashuka aba agize izo ndirimbo, aherekezwa n’amashusho yazo asanishwa n’urukozasoni. Ibiteye impungenge ni uko usanga abana hirya no hino barazimize bunguri banaziceza kurusha ba nyiri kuzihimba.
Mu ndirimbo nshya Irabashaka Louise ukoresha amazina ya Aulah Off, yatunguranye ashyiramo amashusho ari mu gitanda yinyonga hejuru y’umusore bambaye ubusa. Ni indirimbo irimo amagambo yumvikanisha umukobwa uri kubwira umuhungu yakunze cyane ko amurutira abandi bose.
Aulah Off agaragaramo igice kinini ari kumwe n’umusore bari mu cyumba, basa n’abishimisha baryohewe n’urukundo. Abwira uyu musore ko akumbuye Sosiso amuha ibyo yise ibirori.
Hari aho aririmba ati ” Come to my bed,..ungeza ibicu nkumva sinkeneye nizo Lo, ndikumwe nawe from now mpaka n’injoro,..”
Aulah Off yabwiye UMUSEKE ko iyi ndirimbo yayise Sosiso nyuma yo gusanga abantu benshi biganjemo urubyiruko bayikunda, asobanura ko hari ubutumwa yashatse gutambutsa mu buryo bwa gihanzi.
Yagize ati“Nkora umuziki ngamije gutanga ubutumwa no gutanga ibyishimo mu ndirimbo zanjye, Sosiso ni indirimbo y’ibyishimo”
Ku mbuga nkoranyambaga ababonye amashusho y’iyi ndirimbo bayamaganye bavuga ko igamije kurarura urubyiruko ndetse no gusakaza ingeso mbi y’ubusambanyi.
- Advertisement -
Hari uwagize ati “Ibi bintu abahanzi nyarwanda biharaje bizaherera he, mbona bikwiriye guhagurukirwa.”
Undi nawe yunzemo ati “Aba bana bangijwe na bakuru babo baririmba ibishegu, abahanzi bacu bari gukora nkaba USA.”
Hari abagaragaje kwishimira iyi ndirimbo basaba uyu mukobwa kudacika intege agakora cyane hakongera kuboneka umukobwa ukora Hip Hop ufite imbaraga mu Rwanda.
Uyu wiyita Holly Voice yagize ati “Aulah wowe n’ubundi uri Badkiller nice vibe kabisa ishimwe kuri Laser Beat urikuduha abantu nkamwe, Aulah Off narinsanzwe nkuzi Wallah.”
Uyu mukobwa utuye i Kagugu mu Mujyi wa Kigali avuga ko agihura n’imbogamizi zirimo kuba hari abanyamakuru basa n’abamwijunditse batifuza gutambutsa ibihangano bye.
Iyi ndirimbo ya Aulah Off yakozwe na Laser Beat nyiri The Beam Entertainment ni mu gihe amashusho yatunganyijwe na Ayo Merci.
Amashushoy’indirimbo Sosiso ya Aulah Off
NDEKEZI JOHNSON / UMUSEKE.RW