Ikipe itozwa n’umunyamakuru, Biganiro Mucyo Antha, Gatoto FC yahize kwegukana igikombe cy’Agaciro Pre-season Tournament kiri gukinirwa kuri Stade Mumena.
Ku wa Kabiri tariki 4 Nyakanga 2023, ni bwo hatangiye gukinwa imikino ya 1/2. Gatoto FC yabimburiye izindi maze ibifashijwemo na rutahizamu Saddick Soule itsinda Brésil&Friends yiganjemo abavuka i Rubavu igitego 1-0.
Iyi kipe itozwa na Biganiro Mucyo Antha inayoborwa na Nzabonimpa Jean Damascène uzwi nka Desailly, yahize ko igomba kwegukana iki gikombe kiri gukinirwa ku nshuro ya Kabiri.
Abatoza ndetse n’ubuyobozi ba Gatoto FC, intero ni imwe bose bari guhurizaho yo kuzegukana iki gikombe.
Indi yageze ku mukino wa nyuma, ni Revelation FC itozwa na Kayiranga Baptiste. Yahageze isezereye Kicukiro FC ku ntsinzi y’ibitego 2-1 byatsinzwe na Mbonyumwami Thaiba na Rudasingwa Prince.
Umukino wa nyuma, biteganyijwe ko uzakinwa ku wa Gatandatu tariki 8 Nyakanga 2023 Saa cyenda z’amanywa kuri Kigali Pelé Stadium niba nta gihindutse.
Iri rushanwa ryatanze ibyishimo ku bakunzi ba ruhago mu Rwanda, biciye ku makipe yari afite benshi bayakunda nka Gatoto FC na Brésil&Friends FC.
Igikombe cy’umwaka ushize, kibitswe na Golden Generation FC yasezerewe igeze muri 1/4.
UMUSEKE.RW