Mu mikino y’umunsi wa Mbere ya kamarampaka [Playoffs] muri shampiyona ya Basketball, ikipe ya REG Basketball Club na APR Basketball Club, zatangiye zitsinda.
Ku wa Gatatu tariki 23 Kanama 2023, ni bwo hatangiye imikino ya kamarampaka muri shampiyona ya Basketball, mu byiciro byombi.
Mu bagabo, habaye imikino ibiri, mu gihe mu cyiciro cy’abagore habaye umukino umwe gusa.
Imikino yo mu Cyiciro cy’abagabo, habanje umukino wa REG BBC na Espoir BBC. Ni umukino woroheye iyi kipe iterwa inkunga n’Ikigo cy’Igihugu Gishinzwe Ingufu kuko yawutsinze ku manota 85-79.
Undi mukino wabaye mu bagabo, ni uwahuje APR BBC na Patriots BBC. Iyi kipe y’Ingabo z’Igihugu, yawutsinze ku manota 69-59. Umukinnyi, Nshobozwabyosenumukiza Jean Jacques Wilson, yatsindiye APR amanota 20, akora Rebounds eshatu anatanga imipira itatu yavuyemo amanota.
Mu cyiciro cy’abagore ho, habaye umukino umwe wahuje ikipe ya APR WBBC yatsinze The Hoops WBBC amanota 74-69. Ni umukino wabereye muri Lycée de Kigali, mu gihe imikino y’icyiciro cy’abagabo yabereye muri BK Arena.
Mu bagore hari umukino utarabaye, wagombaga guhuza IPRC-Huye na REG ariko kubera impamvu z’ishuri ku banyeshuri bo muri IPRC, ntiwaba. Biteganyijwe ko uzakinwa ku wa Gatanu w’ejo.
Imikino y’umunsi wa Kabiri muri iyi ya kamarampaka, iteganyijwe ku wa Gatanu tariki 25 Kanama 2023.
HABIMANA SADI/UMUSEKE.RW