Ubwo hakinwaga irushanwa ry’umukino w’intoki wa Volleyball ku nshuro ya Gatatu, Kirehe Open Tournament, ritegurwa n’Akarere ka Kirehe gafatanyije n’Ishyirahamwe ry’Umukino wa Volleyball mu Rwanda, abakinnyi ba Police VC bagaragaje urwego rwo hejuru kurusha bagenzi ba bo.
Ni irushanwa ryatangiye gukinwa mu 2019. Mu 2020 na 2021 ntabwo ryabaye bitewe no kuba mu Rwanda kimwe n’ahandi ku Isi hari icyorezo cya Covid-19. Bisobanuye ko ryaherukaga gukinwa mu 2022.
Ubwo ryakinwaga ku wa Gatandatu no ku Cyumweru tariki 23-24 Nzeri 2023, ryegukanywe n’kipe ya Police VC mu bagabo, mu bagore ryegukanwa na RRA WVC yaryegukanaga ku nshuro ya Kabiri.
Abakinnyi ba Police VC biganje mu kipe y’irushanwa mu bagabo, mu gihe aba RRA biganje mu y’irushanwa y’abagore.
Ikipe y’Irushanwa mu bagabo: Ndayisaba Sylivestre, Ntanteteri Cryspin, Ntagengwa Olivier, Muvara Ronald, Kwizera na Irakoze Alain [Libero]. Ikipe y’irushanwa mu bagore: Akimanizanye Ernestine, Musaniwabo Hope, Uwimbabazi Léa, Yankurije Françoise na Nzamukosha Olive.
Amakipe amaze kuryegukana mu bagabo: REG VC [2019], Gisagara VC [2022] na Police VC [2023]. Amakipe amaze kuryegukana mu bagore: RRA [2022, 2023] na APR [2019].
Abakinnyi bitwaye neza mu irushanwa kurusha abandi ni Ntagengwa Olivier mu bagabo na Yankurije Françoise mu bagore. Ikindi muri iri rushanwa, ni uko mu bagabo nta kipe irabasha kuryegukana inshuro ebyiri, mu gihe mu bagore RRA ikibitse inshuro ebyiri muri eshatu rimaze gukinwa.
HABIMANA SADI/UMUSEKE.RW
