Nyuma y’imvune ikomeye y’umunyezamu wa AS Kigali, Kimenyi Yves, umukunzi we, Miss Muyango Claudine, yifashishije indirimbo ya Zizou na King James, asaba Imana kumukomeza ku bw’ibihe bikomeye umuryango we urimo.
Imvune Kimenyi yagize, ni iy’amagufa abiri yo ku Murundi. Yayigiriye mu mukino wahuje Musanze FC na AS Kigali ku Cyumweru tariki ya 29 Ukwakira 2023, nyuma yo gukinirwa nabi na Peter Agblevor wanahise ahabwa ikarita y’umutuku.
Nyuma yo guhabwa ubutabazi bw’ibanze mu Bitaro Bikuru bya Ruhengeri, uyu munyezamu yahise ajyanwa mu Bitaro by’Inkuru Nziza biherereye i Gikondo ari na ho agomba kubagirwa.
Miss Muyango Claudine usanzwe ari umukunzi wa Kimenyi Yves ndetse wanamubyariye imfura, yasabye Imana kumuha gukomera muri ibi bihe bitamworoheye arimo.
Ni ubusabe yasabye yifashishije indirimo ya Zizou na King James yitwa ‘Nkomeza.’
Miss Muyango abinyujije kuri Instagram ku gice cy’ahacishwa ubutumwa bumara amasaha 24, yashyizeho agace gato k’indirimbo ‘Nkomeza’, kagira kati “Nkomeza Mana, nkomeza Mana. Ndi umwana w’Umuntu, nkomeza Mana, nkomeza Mana.”
Ni ubutumwa bwaherekejwe n’akamenyetso k’umutima w’umweru, agaragaza ko icyaba cyose azaguma mu ruhande rw’umukunzi we.
Ibi byago byaje, mu gihe kuri uyu wa Mbere, amakuru avuga ko Kimenyi na Miss Muyango bagombaga kujya gusezerana imbere y’amategeko, mu gihe mu Ukuboza uyu mwaka bari bafitanye ubukwe.
Uyu munyezamu yaciye mu makipe arimo APR FC, Rayon Sports, Kiyovu Sports, Isonga FC na AS Kigali arimo ubu.
- Advertisement -
HABIMAMA SADI/UMUSEKE.RW
