Ikipe ya REG Volleyball Club, ntiri mu makipe azitabira irushanwa rya Volleyball ryiswe ‘TaxPayers Appreciation Volleyball Tournament 2023’, ritegurwa n’Ikigo cy’Igihugu cy’Imisoro n’Amahoro (RRA) gifatanyije n’Ishyirahamwe ry’Umukino w’Intoki wa Volleyball mu Rwanda, FRVB.
Tariki 11-12 Ugushyingo 2023, hazaba hakinwa irushanwa ngarukamwaka rya Volleyball rigamije gushimira abasora neza.
Taxpayers Appreciation Volleyball Tournament 2023, izakinwa n’amakipe icumi arimo atanu y’Abagore n’atanu y’Abagabo atarimo REG VC.
Amakuru yizewe UMUSEKE wamenye, ni uko impamvu ikomeye yatumye REG VC itabasha kwitabira iri rushanwa, ni uko bamwe mu bari abakinnyi ba yo, basoje amasezerano ndetse iyi kipe ikaba iri kwitegura irushanwa ry’Akarere ka Gatanu.
Abakinnyi bamaze gusohoka muri REG VC, berekeza muri Kaminuza ya Kepler University nyuma yo gushinga ikipe ya Volleyball mu bagabo, ndetse ikaba initeguye no guhangana mu Cyiciro cya mbere umwaka utaha.
Iyi kipe itozwa na Nyirimana Fidèle, ni yo yatinyutse bwa mbere guhaha muri REG VC, maze iyitwara abakinnyi babiri bakomeye barimo Mahoro Nsabimana Yvan ndetse na Tuyizere Jean Baptiste.
Uretse abo kandi bamaze gutandukana na REG VC, undi mu beza iyi kipe yagenderagaho, ni Twagirayezu Emmy, wamaze kwerekeza mu ikipe ya Police VC ndetse ushobora gukurikirwa n’umusore ukomoka mu gihugu cy’u Burundi, Iradukunda Pacifique, gusa we akaba agifite amasezerano azarangirana n’uyu mwaka.
Uretse aba bakinnyi bamaze kubona amakipe berekezamo, Umunya-Cameroun, Guebela Boyomo Auguste Marecha, wasinyiye iyi kipe mu kwezi k’Ugushyingo umwaka ushize, na we yamaze kwisubirira iwa bo.
Guiondong Marcel ni undi mukinnyi na we ukomoka muri Cameroun, bivugwa ko ashobora gutandukana na yo, kuko amasezerano ye yari ageze ku musozo.
- Advertisement -
Aba bakinnyi batandukanye na REG VC bari basoje amasezerano bose, ariko ngo ubuyobozi ntibwagaragaje inyota yo kubakomezanya, ndetse ko n’abo ngo bagerageje kuganiriza batigeze bahuza, akaba ari iyi mbarutso yo kwigendera.
HABIMANA SADI/UMUSEKE.RW